བོད་དོན་ཞུ་གཏུགས་མཐུན་ཚོགས་ཀྱི་ཞུ་གཏུགས་ལས་འགུལ་ཐེངས་གཉིས་པ།

ཟླ་བཞི་བ། 9, 2025ཟླ་བཞི་བ། 9, 2025 Tenzin Lobsang གལ་ཆེན་གནད་དོན་ཁག, གསར་འགྱུར།, གསར་འགོད་གསལ་བསྒྲགས།, ཉེ་བའི་གསར་འགྱུར།, བོད་ཀྱི་གསར་འགྱུར།, བོད་དོན་ཞུ་གཏུགས་ལས་འགུལ།, ལས་འགུལ།, ལོ་འཁོར་ལས་འགུལ། Leave a comment

རྒྱ་གར་གཞུང་དམངས་གཉིས་ནས་བོད་ཀྱི་གནད་དོན་ཐད་སྲིད་བྱུས་བརྟན་པོ་འཛིན་ཐབས་དང་རྒྱ་གར་གྱི་ཆབ་སྲིད་ཚོགས་པ་ཁག་ནས་ཀྱང་བོད་ཀྱི་བདེན་པའི་འཐབ་རྩོད་དང་འབྲེལ་བའི་གྲོས་ཆོད་འཇོག་ཐབས། གཞན་ཡང་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་དང་། མངའ་སྡེའི་གྲོས་ཚོགས་འཐུས་མི་སོགས་ནས་བོད་ཀྱི་གནད་དོན་ཐོག་རྒྱབ་སྐྱོར་གྱིས་གྲོས་ཚོགས་གོང་འོག་གཉིས་ནང་བོད་ཀྱི་གནད་དོན་གླེང་སློང་སོགས་གནང་ཏེ་མཐར་རྒྱ་གར་གྲོས་ཚོགས་གོང་འོག་ནང་བོད་དོན་རྒྱབ་སྐྱོར་གྱི་གྲོས་ཆོད་དང་ཁྲིམས་འཆར་གཏན་འབེབ་སོགས་ལ་དམིགས་ཏེ་ཞུ་གཏུགས་ལས་འགུལ་ཐེངས་དང་པོ་དེ་བཞིན་ཕྱི་ལོ་ ༢༠༢༤ ལོའི་ལོ་འཇུག་དུ་ཞུ་གཏུགས་ལས་འགུལ་སྤེལ་ཡོད། བོད་དོན་ཞུ་གཏུགས་མཐུན་ཚོགས་ཀྱི་ཞུ་གཏུགས་ལས་འགུལ་ཐེངས་གཉིས་པ་དེ་བཞིན་ཕྱི་ལོ་ ༢༠༢༥ ཟླ་ ༣ ཚེས་ ༡༧ ནས་ ༢༨ བར་ཉིན་བཅུའི་རིང་སྤེལ་ཡོད་པ་དང་།

སྐབས་དེར་རྒྱ་གར་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་དང་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་དང་ད་ལྟའི་ལས་ཐོག་གཞུང་འཛིན་སྲིད་སྐྱོང་གཙོས་ཁྱོན་གྲོས་ཚོགས་འཐུས་མི་ ༥༤ དང་གནད་ཡོད་གཉིས་བཅས་ཁྱོན་གནད་ཡོད་མི་སྣ་ ༥༦ ཙམ་དང་མཇལ་འཕྲད་ཀྱིས་བོད་ནང་གི་ཛ་དྲག་གནས་སྟངས་དང་། ཧིན་བོད་གཉིས་ཀྱི་ས་མཚམས་ངོས་འཛིན་དགོས་གལ་སོགས་ཀྱི་འབོད་སྐུལ་ཞུ་སྙན་དོན་ཚན་ལྔ་ཅན་ཞིག་ཕུལ་ཡོད་པ་མ་ཟད། གྲོས་ཚོགས་ནང་བོད་ཀྱི་གནད་དོན་གླེང་སློང་གནང་སྐྱོང་ཡོང་བའི་འབོད་སྐུལ་སོགས་ཞུས། སྐབས་དེར་གྲོས་ཚོགས་འཐུས་མི་ ༡༢ དེ་སྔོན་ཞུ་གཏུགས་ལས་འགུལ་ཐེངས་དང་པོའི་སྐབས་མཇལ་འཕྲད་བྱུང་ཡོད་པ་དང་ཁོང་རྣམ་པར་འབྲེལ་བ་དམ་ཟབ་གཏོང་ཐབས་དང་། གྲོས་ཚོགས་འཐུས་མི་གཞན་ཆ་ཚང་དེ་སྔོན་མཇལ་འཕྲད་མ་བྱུང་བ་རྐྱང་ཡིན་པས་བོད་དོན་གོ་རྟོགས་གང་ལེགས་སྤེལ་ཐུབ་པ་བྱུང་ཡོད། འབོད་སྐུལ་ཞུ་སྙན་ནང་བོད་ནི་ལོ་རྒྱུས་ཐོག་རང་བཙན་གྱི་རྒྱབ་ཁབ་ཅིག་དང་ལོ་རྒྱུས་ཐོག་ཧིན་བོད་གཉིས་ཀྱི་ས་མཚམས་ལས་རྒྱ་དཀར་ནག་གཉིས་དབར་ས་མཚམས་ཤིག་མེད་ཚུལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གོ་སྟོན་འཁྲུངས་སྐར་དང་སྟབས་བསྟུན་གྱིས་ཁོང་གི་རླབས་ཆེན་གྱི་མཛད་རྗེས་ལ་ངོས་འཛིན། དམིགས་བསལ་རྒྱ་གར་གྱི་གནའ་བོའི་རིག་གཞུང་མི་ཉམས་རྒྱུན་འཛིན་དར་སྤེལ་གཙོས་འཛམ་གླིང་སྐྱེ་འགྲོ་ཀུན་གྱི་བདེ་སྡུག་ལ་དམིགས་ཏེ་སྐུ་ཚེ་ཧྲིལ་པོར་སྐུ་ལས་བསྐྱོན་གནང་བར་ཆེ་བསྟོད་ཀྱིས་གྲོས་ཚོགས་ནང་གླེང་སློང་དང་འཁྲུངས་སྐར་སྲུང་བརྩི་དགོས་གལ། ད་ལྟའི་ཆར་དགྲ་བོ་རྒྱ་དམར་སྲིད་གཞུང་ནས་བོད་ཀྱི་ཆོས་དང་རིག་གཞུང་གི་ངོ་བོ་དང་བཅས་པ་རྩ་མེད་བཟོ་བཞིན་པའི་ཛ་དྲག་གནས་སྟངས་ཐོག་གླེང་སློང་དགོས་གལ། གཞན་ཡང་ཉེ་བའི་ཆར་དགྲ་བོ་རྒྱ་དམར་སྲིད་གཞུང་ནས་ལོ་རྒྱུས་ལ་འཁྱོག་བཤད་དང་རྫུན་བཟོ་སོགས་བྱས་ཏེ་བོད་ཅེས་པའི་ཐ་སྙད་དེ་ཡང་རྒྱལ་སྤྱིའི་སྤྱི་ཚོགས་དང་སྡིངས་ཆ་ནས་རྩ་མེད་བཟོ་རྒྱུའི་སྲིད་བྱུས་དང་། བོད་ཀྱི་འཁོར་ཡུག་སྲུང་སྐྱོབ་དང་རྒྱ་གར་གྱི་བདེ་འཇག་བར་འབྲེལ་བ་དམ་ཟབ་ཡོད་སྐོར་སོགས་ཀྱི་ཐད་རྒྱབ་སྐྱོར་དང་གླེང་སློང་གནང་སྐྱོང་བའི་འབོད་སྐུལ་གྱི་ཞུ་སྙན་ཕུལ་ཡོད་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཀྱི་གནད་དོན་ཐོག་གལ་གནད་རང་བཞིན་གྱི་གྲོས་ཚོགས་འཐུས་མི་ ༤༦ གིས་མཚན་རྟགས་ཡོད་པའི་ཐུན་མོང་གི་བསྒྲགས་གཏམ་ཞིག་ཀྱང་སྤེལ་ཐུབ་པ་བྱུང་ཡོད།

གཞན་ཡང་འབྲུག་གཞུང་ཕྱི་འབྲེལ་ལྷན་ཁང་ནས་རྒྱ་གཞུང་གིས་ཆེད་གཏོང་བྱས་པའི་ཟློས་གར་འཁྲབ་སྟོན་དང་འབྲེལ་བའི་གཞུང་འབྲེལ་གསར་འགོད་གསལ་བསྒྲགས་ནང་དབྱིན་སྐད་ཐོག་བོད་ཅེས་པའི་ཐ་སྙད་ཀྱི་ཚབ་ཏུ་ཤི་ཙང་ཞེས་ཉེ་དུས་རྒྱ་གཞུང་གིས་ངེན་སྐུལ་བྱེད་བཞིན་པའི་ཐ་སྙད་བཀོལ་སྤྱོད་བྱས་པར་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་ལྔ་གཙོས་རྒྱལ་སྤྱིའི་ཚོགས་པ་ ༡༤༤ ལྷག་གིས་བསྐྱོན་བརྗོད་ཀྱིས་མཚན་འཁོད་ཞུ་སྙན་ཞིག་ཞུ་གཏུགས་ལས་འགུལ་ནང་མཉམ་ཞུགས་གནང་མཁན་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་གི་སྐུ་ཚབ་རྣམས་ནས་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་འབྲུག་རྒྱལ་ཁབ་ཀྱི་གཞུང་ཚབ་ཁང་དུ་ཕུལ་ཐུབ་པ་ཡང་བྱུང་ཡོད།

བོད་མིའི་རང་དབང་སྒེར་ལངས་གསུམ་ཅུའི་དུས་དྲན་ཐེངས་ ༦༦ པ་སྲུང་བརྩིའི་ལས་འགུལ།

ཟླ་གསུམ་པ། 11, 2025ཟླ་གསུམ་པ། 13, 2025 Tenzin Lobsang གལ་ཆེན་གནད་དོན་ཁག, གསར་འགྱུར།, གསར་འགོད་གསལ་བསྒྲགས།, བོད་ཀྱི་གསར་འགྱུར།, བོད་དོན་ཞུ་གཏུགས་ལས་འགུལ།, ལས་འགུལ།, ལོ་འཁོར་ལས་འགུལ། Leave a comment

བོད་མིའི་རང་དབང་སྒེར་ལངས་གསུམ་ཅུའི་དུས་དྲན་ཐེངས་ ༦༦ པ་སྲུང་བརྩིའི་ལས་འགུལ།

བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གིས་སྣེ་ཁྲིད་འོག་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༦ པ་དེ་བཞིན་བཞུགས་སྒར་རྡ་ས་དང་ལྡི་ལི། དེ་བཞིན་བྱང་ཤར་ཨ་སམ་མངའ་སྡེའི་གྷོ་ཝ་ཧ་ཊི་སོགས་སུ་ལས་འགུལ་སྤེལ་བའི་ལས་བསྡོམས་སྙཱིང་བསྡུས་སུ།

བཞུགས་སྒར་རྡ་སར་བོད་ཀྱི་གཞོན་ནུ་ལྷན་ཚོགས་གཙོས་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་བཞི་ནས་ལས་འགུལ་གོ་སྒྲིག་གིས་ཟླ་བ་གཅིག་གི་སྔོན་ཚུད་ནས་ཚོགས་འདུ་རིམ་པར་སྐོང་ཚོགས་ཀྱིས་བོད་དབྱིན་ཧིན་གསུམ་གྱི་བསྒྲགས་གཏམ་གྲ་སྒྲིག་དང་། བཞུགས་སྒར་ཁུལ་གྱི་རི་མོ་སྒྱུ་རྩལ་བ་དང་། དང་བླངས་སོགས་བསྡུ་བསྐོང་གིས་ཉིན་ཕྱེད་གཉིས་རིང་འཕྲེད་དར་དང་གྱང་སྦྱར་སོགས་ཀྱི་འབོད་ཚིག་སོགས་གོ་སྒྲིག་དང་། གཞུང་འབྲེལ་མིན་པའི་ཚོགས་པ་ཁག་གི་དང་བླངས་སྒྲིག་ཆས་སོགས་གསར་བཟོ། གཞན་ཡང་འདི་ལོར་དམིགས་བསལ་གྱིས་མེག་གྷན་ཁྲོམ་གཞུང་དུ་བོད་རྒྱལ་དར་སྒྲེང་འཛུགས་དང་ས་ཚིགས་གང་མང་ཞིག་ལ་འཕྲེད་དར་སྒྲེང་འཛུགས་སོགས་ཀྱི་དུས་དྲན་སྲུང་བརྩིའི་སྔོན་བརྡ་དང་། མི་མང་ནང་ཁུལ་སེམས་ཚོར་དང་ཕྱིའི་ཡུལ་སྐོར་སྤྲོ་འཆམ་པ་ཚོར་དུས་དྲན་ངོ་སྤྲོད་སོགས་ཡོང་ཐབས་ཀྱི་བྱེད་སྒོ་འདྲ་མིན་ལག་བསྟར་བྱས་རྗེས། གསུམ་བཅུའི་དུས་དྲན་ཉིན་གྱི་གཞུང་འབྲེལ་མཛད་སྒོ་ལེགས་གྲུབ་བྱུང་མཚམས་གཞུང་འབྲེལ་མིན་པའི་ཚོགས་པ་ཆེ་ཁག་གི་མཛད་གཙོ་ཚོས་སྣེ་ཁྲིད་འོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་ནས་རྡ་ས་ཀ་ཅ་རི་བར་ངོ་རྒོལ་སྐད་འབོད་ཀྱི་གོམ་བགྲོད་ལས་འགུལ་སྤེལ་ཡོད། སྐབས་དེར་ལག་བྲིས་འཕྲེད་དར་སོགས་ཀྱི་ཐོག་གསུམ་བཅུའི་དུས་དྲན་བོད་མིའི་རང་དབང་སྒེར་ལངས་ཐེངས་དང་པོའི་འབོད་ཚིག་༸གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག བོད་རང་བཙན་གཙང་མ་ཡིན། རྒྱ་དམར་བོད་ནས་ཕར་རྒྱུགས་ཤིག་ཅེས་སོགས་བཀོད་ཏེ་གོམ་བགྲོད་ཀྱི་མགོ་འཇུག་བར་གསུམ་དུ་སྒྲེང་འཛུགས་དང་སྐད་འབོད་སྣེ་ཁྲིད་ལ་དམིགས་ཏེ་གླ་འཁོར་གོ་སྒྲིག་སོགས་འཐུས་ཚང་ཐོག་གོམ་བགྲོད་ལས་འགུལ་སྤེལ་ཡོད། ལས་འགུལ་བ་རྣམས་མཐར་ཀ་ཅ་རིར་འབྱོར་མཚམས་འབོད་ཚིག་མཉམ་བསྒྲགས་དང་བཅས་མཛད་རིམ་དབུ་འཛུགས་དང་། མཛད་རིམ་གྱི་ཐོག་མར་ཧིན་བོད་གཉིས་ཀྱི་རྒྱལ་གླུ་དང་གསུམ་བཅུའི་དྲན་གླུ། མི་མང་ལངས་གླུ་སོགས་མཉམ་གཏོང་དང་། ད་བར་བོད་ཕྱི་ནང་གཉིས་ནས་བོད་རྒྱལ་ཁབ་དང་མི་རིགས་ཀྱི་དོན་དུ་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་འདུད་ཞུས་རྗེས་བོད་ཀྱི་མང་གཙོ་ཚོགས་པའི་ཚོགས་གཙོ་མཆོག་གི་གཙོ་སྐྱོང་འོག་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཞོན་མཆོག་ནས་དུས་དྲན་ངོ་སྤྲོད་ཀྱི་གསུང་བཤད་གནང་ཡོད་པ་དང་། དེ་ཡང་གཙོ་བོ་བོད་ནང་གི་ཛ་དྲག་གནས་སྟངས་དང་། བོད་མི་ནང་ཁུལ་ཆིག་སྒྲིལ་དགོས་གལ། རང་ཉིད་ཀྱི་བུ་རབས་ཚ་རྒྱུད་ལ་རྒྱལ་ཞེན་གྱི་བསམ་བློ་སྤྲོད་དགོས་གལ་གཙོས་སློབ་གྲྭ་ཁག་ནས་ཀྱང་གཞོན་སྐྱེས་རྣམས་ལ་འཐབ་རྩོད་ཀྱི་བསམ་བློའི་སློབ་གསོ་སྤྲོད་དགོས་གལ་སོགས་ཀྱི་ཐད་གཏམ་བཤད་སྤེལ་ཡོད། དེ་རྗེས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་རམ་སོ་རབ་མཆོག་ནས་ཀྱང་བོད་ཀྱི་བདེན་པའི་འཐབ་རྩོད་ལ་རྒྱ་གར་གཙོས་རྒྱལ་སྤྱིའི་སྤྱིའི་སྤྱི་ཚོགས་ནས་རྒྱབ་སྐྱོར་སྔར་ལྷག་གནང་སྐྱོང་ཡོང་བའི་འབོད་སྐུལ་ཞུས་པ་དང་ཁོང་རང་ཉིད་ནས་ཀྱང་བོད་དོན་འཐབ་རྩོད་ལ་རྒྱབ་སྐྱོར་དང་གདུང་སེམས་མཉམ་སྐྱེད་མུ་མཐུད་གནང་རྒྱུ་ཡིན་པ་སོགས་ཀྱི་གསུང་བཤད་གནང་རྗེས་བོད་རང་བཙན་སློབ་ཕྲུག་ཚོགས་པའི་འགན་འཛིན་མཆོག་ནས་དབྱིན་ཡིག་བསྒྲགས་གཏམ་སྒྲོག་སྦྱང་གནང་རྗེས་བོད་ཀྱི་བུད་མེད་ཚོགས་པའི་ཚོགས་གཙོ་མཆོག་ནས་ཧིན་དྷིའི་བསྒྲགས་གཏམ་སྒྲོག་སྦྱང་སོགས་ཞུས་ཏེ་བཞུགས་སྒར་དུ་གཞོན་ལྷན་སྤྱི་ཁྱབ་ཚོགས་གཞོན་དང་དྲིལ་བསྒྲགས་འགན་འཛིན་རྣམ་གཉིས་ཀྱིས་སྣེ་ཁྲིད་འོག་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༦ པའི་དུས་དྲན་སྲུང་བརྩིའི་ལས་རིམ་གང་ལེགས་བྱུང་ཡོད།

རྒྱ་གར་གྱི་རྒྱལ་ས་ལྡི་ལིར་བོད་མིའི་རང་དབང་སྒེར་ལངས་གསུམ་བཅུའི་དྲུས་དྲན་སྲུང་བརྩིར་དམིགས་ཏེ་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་བསོད་ནམས་ཚེ་རིང་ཆེད་བཅར་གྱིས་སྤྱི་ཚེས་ ༨ ཉིན་གྱི་ཉིན་རྒྱབ་ལྡི་ལི་བསམ་ཡས་གླིང་དང་རོ་ཧི་ནི་ས་གནས་གཞོན་ལྷན་གྱི་རྒྱུན་ལས་རྣམས་དང་ལྷན་ཇན་ཏར་མན་ཏར་དུས་དྲན་སྲུང་བརྩི་དང་དགྲ་བོ་རྒྱ་དམར་སྲིད་གཞུང་གི་གཞུང་ཚབ་མདུན་ཐང་དུ་རྒོལ་འཆོངས་གནང་ཕྱོགས་སོགས་ཀྱི་ཐད་ཚོགས་འདུ་དང་དེ་འབྲེལ་དགོས་རིགས་ཀྱི་འཕྲེད་དར་གསར་བཟོ། གཞན་ཡང་ལས་བགོས་ཀྱིས་ཕྱི་ཉིན་གཞོན་ལྷན་སྤྱི་ཁྱབ་དྲུང་ཆེ་དང་དྲྭ་རྒྱ་དོ་དམ་པ། བསམ་ཡས་གླིང་གི་ཚོགས་གཙོ་བཅས་ཇན་ཏར་མན་ཏར་ས་ཚིགས་སུ་ཆེད་བཅར་གྱིས་གྲ་སྒྲིག གཞན་ཡང་རོ་ཧི་ནི་བོད་ཁྱིམ་སྡོད་ཁང་དུ་ཆེད་བཅར་གྱིས་གཞུང་ཚབ་མདུན་ཐང་དུ་རྒོལ་འཆོངས་གནང་མཁན་དང་བླངས་ལས་འགུལ་བ་ཚོར་ལས་འགུལ་ངོ་སྤྲོད་དང་སྣེ་ཁྲིད་གནང་མཁན་ཚོར་ས་ཚིགས་ངོ་སྤྲོད་གཙོས་ཉེན་རྟོགས་པའི་ལམ་སེང་འཇུ་བཟུང་གི་ཉེན་ཁ་ལས་གཡོལ་ཐབས་སོགས་ཀྱི་སྦྱོང་བརྡར་སོགས་སྤྲད་ཡོད་པ་མ་ཟད། ལས་འགུལ་བའི་ཁྲོད་ལ་དྭགས་ཡུལ་མི་མང་དག་ཅིག་ཡོད་པར་སོང་བསམ་ཡས་གླིང་ས་གཞོན་ལྷན་ལས་འགུལ་བ་ཨབ་རྒན་ལགས་ནས་ལ་དྭགས་ཡུལ་སྐད་བརྒྱུད་ཐུགས་རྗེ་ཆེ་ཞུ་དང་ལས་འགུལ་གསལ་བཤད་སོགས་གནང་ཏེ་གྲ་སྒྲིག་གི་ལས་དོན་གང་ལེགས་དང་། ཕྱི་ཉིན་ཏེ་ཕྱི་ཟླ་ ༣ པའི་ཚེས་ ༡༠ ཉིན་གྱི་སྔ་དྲོ་ཕྱག་ཚོད་ ༡༠།༥༠ ཐོག་མཐོ་སློབ་ལས་འགུལ་བ་ ༥༠ ཙམ་ནས་དགྲ་བོ་རྒྱ་དམར་སྲིད་གཞུང་གི་གཞུང་ཚབ་མདུན་ཐང་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་རྗེས་རྒྱ་གར་ཉེན་རྟོག་པས་འཇུ་བཟུང་གིས་རྒྱལ་ས་ལྡི་ལིའི་མཐའ་མཚམས་ན་རེ་ལ་ཉེན་རྟོག་ཁང་ནང་ཉིན་གང་བཀག་ཉར་གནང་སྟེ་དགོང་དྲོ་ཆུ་ཚོད་ ༦།༢༠ ཐོག་གློད་བཀྲོལ་བཏང་ཡོད། གློད་བཀྲོལ་བྱུང་རྗེས་སློབ་ཕྲུག་ལས་འགུལ་བ་རྣམས་ལྡི་ལི་བསམ་ཡས་གླིང་དུ་འབྱོར་མཚམས་བསམ་ཡས་གླིང་ས་གནས་གཞོན་ལྷན་དང་ས་གནས་བུད་མེད། གཞན་ཡང་གནས་སྡོད་བོད་མི་རྣམས་ནས་ཡི་རངས་ཀྱིས་དགའ་བསུའི་སྣེ་ལེན་གནང་ཡོད་པ་མ་ཟད། ལས་འགུལ་བ་རྣམས་ལྡི་ལི་བསམ་ཡས་གླིང་ས་གནས་གཞོན་ལྷན་གྱི་གོ་སྒྲིག་ཞུས་པའི་མར་མེའི་ཁྲོམ་སྐོར་ནང་མཉམ་ཞུགས་གནང་ཏེ་ལས་འགུལ་མཇུག་སྒྲིལ་གནང་ཡོད། དེ་ཉིན་ལྡི་ལི་བསམ་ཡས་གླིང་ཉིན་སློབ་ནང་གཞུང་འབྲེལ་མཛད་རིམ་གྲུབ་མཚམས་ས་གནས་གཞོན་ལྷན་ནས་མང་ཚོགས་རྣམ་པར་སྤྱི་སྤྱོད་གླ་འཁོར་གོ་སྒྲིག་གིས་ཇན་ཏར་མན་ཏར་ཕྱོགས་ཐོན་དང་། ཇན་པཊ་ནས་ཇན་ཏར་མན་ཏར་བར་གོམ་བགྲོད་ལས་འགུལ་དང་ཇན་ཏར་མན་ཏར་ངོ་རྒོལ་སྐད་འབོད་ཀྱི་ལས་འགུལ་སྤེལ་ཡོད་པ་མ་ཟད། སྐབས་དེར་གཞོན་ལྷན་སྤྱི་ཁྱབ་དྲུང་ཆེ་དང་དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཟུར་པ་སྐུ་ངོ་ཨ་ཅརྱ་ཡེ་ཤེས་ཕུན་ཚོགས་མཆོག བདག་ཉིན་ཆེན་པོ་གྷན་དྷིའི་བསྟི་གནས་ཁང་གི་དཔེ་མཛོད་འགན་འཛིན་དང་བོད་དོན་རྒྱབ་སྐྱོར་བ་སྐུ་ཞབས་ (Ramesh Chadra) མཆོག གཞན་ཡང་འཕགས་བོད་མཛའ་འབྲེལ་ཚོགས་པའི་ལྡི་ལི་ས་གནས་ཚོགས་གཙོ་དང་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་ཞུས་པའི་ ༡༩༩༨ ལོར་ཟས་བཅད་ངོ་རྒོལ་གྱི་ལས་འགུལ་ནང་མཉམ་ཞུགས་གནང་མཁན་རྒྱལ་གཅེས་པ་སྐུ་ཞབས་ཟླ་བ་ཚེ་རིང་ལགས་བཅས་ནས་གཏམ་བཤད་རིམ་པར་སྤེལ་ཏེ་ངོ་རྒོལ་སྐད་འབོད་ཀྱི་ལས་འགུལ་གང་ལེགས་བྱུང་ཡོད།

འདི་ལོར་བྱང་ཤར་ས་གནས་གཞོན་ལྷན་ཁག་གི་གོ་སྒྲིག་འོག་མི་མང་ལྔ་བརྒྱ་ལྷག་རྒྱ་གར་གྱི་ཨ་སམ་མངའ་སྡེའི་གྲོང་ཁྱེར་གྷོ་ཝ་ཧ་ཊིར་མཉམ་འཛོམས་ཐོག་ངོ་རྒོལ་སྐད་འབོད་དང་གོམ་བགྲོད་ཀྱི་ལས་འགུལ་གོ་སྒྲིག་ཞུས་པ་ཡོད་པ་དང་། དུས་དྲན་གྱི་མཛད་སྒོ་དེ་བཞིན་ས་གནས་ཤིར་གྷམ་གྱི་མངའ་སྡེའི་ཚོགས་ཁང་དུ་སྐོང་ཚོགས་གནང་ཡོད། སྐབས་དེར་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་སྒྲིག་འཛུགས་འགན་འཛིན་ཡེ་ཤེས་ཆོས་འཕེལ་མཆོག་ཆེད་བཅར་གྱིས་གསུམ་བཅུའི་དུས་དྲན་གྱི་བསྒྲགས་གཏམ་སྒྲོག་སྦྱང་དང་གཏམ་བཤད་སོགས་སྤེལ་ཡོད་པ་མ་ཟད། ངོ་རྒོལ་སྐད་འབོད་དང་གོམ་བགྲོད་ཀྱི་ལས་འགུལ་ནང་མཉམ་ཞུགས་གནང་ཡོད། སྒང་ཏོག་ས་གནས་གཞོན་ལྷན་གྱི་ཚོགས་གཙོ་དང་བྱང་ཤར་ས་གནས་གཞོན་ལྷན་ཁག་གི་ཚོགས་གཙོ་ཚེ་སྤེལ་ལགས་གཙོས་ལས་འགུལ་བ་གྲངས་ ༥༠ ལྷག་ནས་མངའ་སྡེའི་གྲོས་ཚོགས་ཀྱི་ཉེ་ཁྲིས་སུ་བོད་དོན་གོ་རྟོགས་ལ་དམིགས་ཏེ་འབོད་ཚིག་སོགས་བསྒྲགས་ཏེ་ལས་འགུལ་སྤེལ་སྐབས་མངའ་སྡེའི་ཉེན་རྟོག་པས་འཇུ་བཟུང་གིས་ཆུ་ཚོད་དྲུག་ལྷག་བཀག་ཉར་བྱས་མཚམས་གློད་བཀྲོལ་གྱིས་ལས་འགུལ་གང་ལེགས་བྱུང་ཡོད།

བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༦ པའི་གཞོན་ལྷན་གྱི་བསྒྲགས་གཏམ།

ཟླ་གསུམ་པ། 10, 2025ཟླ་གསུམ་པ། 10, 2025 Tenzin Lobsang གལ་ཆེན་གནད་དོན་ཁག, གསར་འགྱུར།, གསར་འགོད་གསལ་བསྒྲགས།, ལས་འགུལ།, ལོ་འཁོར་ལས་འགུལ། Leave a comment

བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༦ པའི་གཞོན་ལྷན་གྱི་བསྒྲགས་གཏམ།

དེ་རིང་ཕྱི་ཟླ་ ༣ ཚེས་ ༡༠ ཉིན་མོ་འདི་ནི་བོད་ཀྱི་རྒྱལ་ས་ལྷ་སར་ཆོལ་གསུམ་སྤུན་ཟླ་སེར་སྐྱ་ཕོ་མོ་ཁྲི་ཚོ་མང་པོས་མ་གྲོས་བསམ་པ་གཅིག་མཐུན་གྱི་ཐོག་ནས་དགྲ་བོ་རྒྱ་དམར་སྲིད་གཞུང་གི་བཙན་འཛུལ་དང་། གཉའ་གནོན་གཤུ་གཞོག་ལ་འགོག་རྒོལ་གྱིས་དཔའ་ངར་ཞུམ་མེད་ངང་བོད་བསྟན་སྲིད་མི་རིགས་ཀྱི་ཆེད་དུ་ལུས་སྲོག་ལོང་སྤྱོད་དང་བཅས་པ་བློས་གཏོང་གིས་རང་ས་རང་སྲུང་དང་། རང་རེའི་དབུ་ཁྲིད་ཉེན་སྲུང་ཞུས་པའི་སྤོབས་པ་སྐྱེ་གཞིའི་ཉིན་མོ་ཞིག་ཡིན་པར་སོང་། དང་ཐོག་བོད་མིའི་ཚེ་འདི་ཕྱི་གཉིས་ཀྱི་མགོན་སྐྱབས་དང་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྒོ་གསུམ་གུས་ཕྱག་དང་། ད་བར་བོད་ཕྱི་ནང་གཉིས་ནས་སྔ་ཕྱི་བར་གསུམ་དུ་བོད་རྒྱལ་ཁབ་སླར་གསོ་དང་མི་རིགས་ཀྱི་ངོ་བོ་སྲུང་སྐྱོབ་སོགས་ཀྱི་སླད་གཅེས་པའི་རང་སྲོག་ཚུན་བློས་གཏོང་གནང་མཁན་གྱི་རྒྱལ་གཅེས་དཔའ་བོ་དཔའ་མོའི་དཔའ་ངར་ཞུམ་མེད་ཀྱི་མཛད་རྗེས་ལ་དགའ་གུས་ཡི་རང་གིས་བཀའ་དྲིན་རྗེས་དྲན་ཞུ་རྒྱུ་མ་ཟད། ད་དུང་ཡིན་ནའང་དགྲ་བོ་རྒྱ་དམར་སྲིད་གཞུང་གིས་བཙན་འཛུལ་དང་གཉའ་གནོན་གཤུ་གཞོག་འོག་མྱངས་དང་མྱོང་བཞིན་པའི་གཞིས་ལུས་སྤུན་ཟླ་ཚོར་གདུང་སེམས་མཉམ་བསྐྱེད་ཞུ་རྒྱུ་ཡིན། དམིགས་བསལ་འདི་ལོར་བོད་གཞིས་རྩེ་དིང་རི་ཁུལ་དུ་ས་ཡོམ་གྱི་འབྱུང་བའི་གནོད་ཚེ་ཚབས་ཆེ་བྱུང་ནས་སྤུན་ཟླ་མང་པོའི་ཚེ་སྲོག་ཤོར་བ་སོགས་མི་རྒྱུ་ཟོག་གསུམ་ལ་གོད་ཆགས་ཚབས་ཆེ་བྱུང་བ་དང་། ཉེ་ཆར་ཡང་བོད་བསྟན་སྲིད་ཉག་ཕྲའི་དུས་སྐབས་སུ་བཀའ་དྲིན་ལྷག་པར་དུ་ཆེ་བའི་༸སྐུའི་གཅེན་པོ་བཀའ་བློན་ཁྲི་ཟུར་ལྷ་སྲས་རྒྱ་ལོ་དོན་གྲུབ་མཆོག་དགོངས་པ་རྫོགས་པའི་ཡིད་སྐྱོའི་གནས་ཚུལ་བྱུང་བ་བཅས་འདས་པོ་རྣམས་ལ་མྱ་ངན་གུས་འདུད་ཞུ་རྒྱུ་དང་། ཤུལ་ལུས་ནང་མི་བུ་ཕྲུག་ཡོངས་ལ་གདུང་སེམས་མཉམ་བསྐྱེད་ཞུ་རྒྱུ་ཡིན།

ལོ་ངོ་ ༦༦ ཡར་སྔོན་གྱི་དེ་རིང་ཉིན་མོར་ཆོལ་གསུམ་སྤུན་ཟླ་རྣམས་ནས་གསུམ་གཉིས་ས་ཡི་དཀྱིལ་འཁོར་དུ་དབང་བསྒྱུར་བའི་བཙན་པོ་རིམ་བྱོན་གྱི་སྙིང་སྟོབས་ངོམས་ཏེ་བོད་རྒྱལ་ཁབ་ཀྱི་བདག་དབང་སྲུང་སྐྱོབ་དང་། རང་གི་དབུ་ཁྲིད་རང་གི་སྲུང་སྐྱོབས་ལ་དམིགས་ཏེ་ནོར་གླིང་དང་ཕོ་བྲང་པོ་ཏཱ་ལའི་མདུན་ཐང་དུ་སྤོབས་སེམས་དང་བཅས་མཉམ་འཛོམས་ཀྱིས་ “༸གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག བོད་རང་བཙན་ཡིན། རྒྱ་དམར་བོད་ནས་ཕར་རྒྱུགས་ཤིག ” སོགས་ཀྱི་འབོད་སྒྲ་གནམ་ས་གཡོ་བར་བསྒྲོགས་ཏེ་བསྟན་དགྲ་རྒྱ་དམར་གྱི་བཙན་འཛུལ་དང་བཙན་གནོན་ལ་འགོག་རྒོལ་བྱས་པའི་སྤོབས་པ་སྐྱེ་འོས་པའི་ཉིན་མོ་ཞིག་དང་། གཉིས་ནས་སྤུན་ཟླ་ཁྲི་ཚོ་མང་པོའི་རང་གི་གཅེས་པའི་ལུས་སྲོག་ལོང་སྤྱོད་དང་ཕ་ས་དགྲ་ལག་ཏུ་ཤོར་བའི་ཉིན་ནག་ཞིག་ཡིན་པས། རང་རིགས་རྣམས་ནས་བསྟན་དགྲའི་བྱ་ངན་རྣམས་རྡོ་བརྐོས་རི་མོ་བཞིན་རྟགས་བརྟན་སེམས་བཅང་གིས་འགོག་རྒོལ་ཐེར་འདོན་ལས་འགུལ་ནང་མཉམ་ཞུགས་དང་། སྤུན་ཟླའི་འདུ་ཤེས་རྡོ་རྗེའི་བྲག་བཞིན་བརྟན་སྲུང་གིས་ཆིག་སྒྲིལ་གྱི་དཔུང་ཤུགས་སྔར་ལྷག་ངོམས་ཏེ་བོད་བསྟན་སྲིད་མི་རིགས་ལ་ཕན་པའི་ཞབས་ཞུ་གང་ནུས་སྒྲུབ་པའི་ཐོག་དུས་དྲན་སྲུང་བརྩི་ཞུ་དགོས་པའི་ཉིན་མོ་ཞིག་ཀྱང་ཡིན། དགྲ་བོ་རྒྱ་དམར་སྲིད་གཞུང་ནས་དྲག་ཆས་བེད་སྤྱོད་ཀྱིས་བོད་རྒྱལ་ཁབ་ཆེན་པོ་བཙན་བཟུང་བྱས་པ་ནས་བཟུང་སྤུན་ཟླ་ཁྲི་ཚོ་མང་པོ་གང་བྱུང་འཛིན་བཟུང་བཙན་ཁྲིད་ཀྱིས་དམར་གསོད་བཏང་ཡོད་པ་དང་། མང་པོ་ཞིག་སྡུག་གཅོང་མནར་གཅོད་ཀྱི་སྲིད་བྱུས་ནག་པོའི་འོག་གར་སོང་ཆ་མེད་དང་མུག་ཤི་ཐེབས་པ། བོད་ཀྱི་རི་ཆུ་ནག་གསུམ་གཙོས་སྣོད་བཅུད་རྣམས་ནས་གཏེར་ཁ་སྔོག་འདོན་དང་ཆུ་རག་གསར་རྒྱག་སོགས་ཀྱིས་མིང་ཙམ་གྱི་འཛུགས་བསྐྲུན་ལས་གཞིའི་འོག་གཏོར་སྐྱོན་ཚབས་ཆེ་གཏོང་མུས་ཀྱིས་བོད་ཀྱི་ཁོར་ཡུག་ཛ་དྲག་ཅན་དུ་གྱུར་པ་དང་། དགོན་སྡེ་རྩ་གཏོར་དང་སློབ་གྲྭ་སོགས་བཙན་གྱིས་སྒོ་རྒྱག་ཏུ་བཅུགས་ཏེ་རང་མི་རིགས་ཀྱི་སྐད་དང་ཡིག་གེ་གཙོས་ཡུལ་སྲོལ་གོམས་གཤིས་རྣམས་རྩ་མེད་བཟོ་རྒྱུའི་སྲིད་བྱུས་འདྲ་མིན་ཞིག་ལག་བསྟར་བྱེད་བཞིན་ཡོད་པར་གཞིས་བཞུགས་སྤུན་ཟླ་རྣམས་ནས་སྔ་ཕྱི་བར་གསུམ་དུ་བཙན་རྒོལ་རྒྱལ་སྐྱོབས་ཀྱི་ལས་འགུལ་བསྟུད་མར་སྤེལ་ཡོད་པ་མ་ཟད། རྒྱལ་གཅེས་དཔའ་བོ་དཔའ་མོ་ ༡༦༩ ལྷག་གིས་སྐུ་ལུས་མེར་སྲེག་གི་བློས་གཏོང་གཙོས་འགོག་རྒོལ་གྱི་ལས་འགུལ་རིམ་པར་སྤེལ་མུས་ཡིན་ཡང་། དགྲ་བོ་རྒྱ་དམར་སྲིད་གཞུང་ནས་ཉམ་ཆུང་བོད་མི་རྣམས་ཀྱི་རེ་འབོད་དང་མངོན་འདོད་ལ་ཉན་འཇོག་རྩ་བ་ནས་མེད་པར། ཁོང་རྣམས་ཀྱི་རང་དབང་དང་ཐོབ་ཐང་སོགས་ལ་རྩིས་མེད་ཀྱིས་གང་བྱུང་འཛིན་བཟུང་བཀག་ཉར་དང་། རྒྱལ་ཁབ་ཁ་བྲལ་གྱི་ཉེས་མིང་འོག་དུས་བཀག་བཙོན་འཇུག་དང་ཐོབ་ཐང་བཙན་འཕྲོག ལས་ཀ་ནས་ཕྱིར་ཕུད་སོགས་ཀྱི་དཀའ་ངལ་སྤྲད་དང་སྤྲོད་མུས་ཀྱི་ཛ་དྲག་གི་གནས་སུ་གྱུར་བཞིན་ཡོད།

ད་དུང་ཉེ་བའི་ཆར་ཡང་དགྲ་བོ་རྒྱ་དམར་སྲིད་གཞུང་ནས་ཐབས་བརྒྱ་བྱུས་སྟོང་གིས་བོད་ཅེས་པའི་ཐ་སྙད་དེ་ཡང་རྒྱལ་སྤྱིའི་སྤྱི་ཚོགས་ནས་ནག་བསུབ་གཏོང་རྒྱུའི་འབད་བརྩོན་ཐོག་བོད་རྒྱ་བསྒྱུར་གྱི་སྲིད་བྱུས་ལག་བསྟར་དང་། ལོ་རྒྱུས་བརྫུན་བཟོ། གནས་ཚུལ་འཁྱོགས་བརྗོད་སོགས་བྱེད་མུས་ཀྱིས་བོད་མི་རིགས་ཀྱི་ངོ་བོ་དེ་བཞིན་སྤྱི་ཡོངས་ནས་ནག་བསུབ་གཏོང་རྒྱུའི་བྱུས་ངན་སྣ་ཚོགས་རྩོམ་བཞིན་ཡོད་པར་ཁ་གཏད་གདོང་ལེན་སྔར་ལྷག་དགོས་གལ་མཐོང་། གཞན་ཡང་ཨ་རིའི་ནང་རྟེན་གཞི་བྱས་པའི་རང་དབང་གི་ཁང་པའི་ལོ་འཁོར་ཞིབ་འཇུག་སྙན་ཐོའི་ནང་འཛམ་གླིང་གི་རྒྱལ་ཁབ་ ༢༡༠ ཡི་ནང་ནས་བོད་ནི་ཆབ་སྲིད་དང་སྤྱི་དམངས་ཀྱི་རང་དབང་ཆེས་སྡུག་ཤོས་དེ་ཡིན་པ་སླར་ཡང་གསལ་སྟོན་གནང་ཡོད་པ་བཅས་གྱི་ཛ་དྲག་གི་གནས་སྟངས་འོག སྔ་ལོར་ཨ་རི་སྲིད་གཞུང་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་གཏན་འབེབས་ཀྱིས་བོད་རང་བཙན་གྱི་བདེན་པའི་ལོ་རྒྱུས་ལ་རྒྱབ་སྐྱོར་དང་རང་གཞུང་བཙན་བྱོལ་བོད་མིའི་སྒྲིག་འཛུགས་ལ་ངོས་འཛིན་སོགས་ཨ་རིའི་ཁྲིམས་སུ་གཏན་འབེབས་ཀྱི་རྒྱབ་སྐྱོར་ཚད་མཐོ་ཐོབ་ཏེ་རྒྱལ་སྤྱིའི་སྤྱི་ཚོགས་ནས་ཀྱང་དེ་བཞིན་ལག་བསྟར་དོན་འཁྱོལ་ཡོང་རྒྱུར་ཁོར་ཡུག་བསྐྲུན་ཡོད་པས། ང་ཚོས་ཀྱང་གོ་སྐབས་དམ་འཛིན་གྱིས་རྒྱལ་ཁབ་གཞན་རྣམས་ནས་བོད་ཀྱི་བདེན་པའི་འཐབ་རྩོད་ལ་སྔར་ལྷག་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་དང་། དམིགས་བསལ་བོད་རང་བཙན་གྱི་བདེན་པའི་ལོ་རྒྱུས་ཀྱི་གནས་བབ་ལ་ངོས་འཛིན་ཡོང་ཐབས་ལ་འབད་བརྩོན་སྔར་ལྷག་གནང་དགོས་རྒྱུ་ནི་གལ་འགང་ཆེན་པོར་མཐོང་། རྒྱ་གར་གཞུང་དམང་གཉིས་ནས་ཀྱང་བོད་ཀྱི་ཆབ་སྲིད་ཀྱི་དཀའ་ངལ་སེལ་ཐབས་སུ་རྒྱབ་སྐྱོར་སྔར་ལྷག་གནང་རྒྱུར་རེ་བ་ཞུ་བཞིན་ཡོད་པ་མ་ཟད། བོད་ཀྱི་གཞོན་ནུ་ལྷན་ཚོགས་གཙོས་ཚོགས་པ་ཆེ་ཁག་དྲུག་ལས་གྲུབ་པའི་རྒྱ་གར་བོད་དོན་ཞུ་གཏུགས་མཐུན་ཚོགས་ཆེད་འཛུགས་ཀྱིས་རྒྱ་གར་གྱི་གྲོས་ཚོགས་གོང་འོག་གཉིས་ནང་བོད་དོན་གླེང་སློང་ཡོང་རྒྱུར་རེ་སྐུལ་ཞུ་བཞིན་ཡོད་པ་མ་ཟད། རྒྱ་གར་གྲོས་ཚོགས་དང་ཆབ་སྲིད་ཚོགས་པ་བཅས་ནས་བོད་ཀྱི་གནད་དོན་ཐོག་གྲོས་ཆོད་གཏན་འབེབ་ཡོང་ཐབས་སོགས་ལ་ཡང་འབད་བརྩོན་ཞུ་བཞིན་ཡོད།

དེ་བཞིན་གཞི་རྒྱ་ཆེ་བའི་ཆབ་སྲིད་ཀྱི་ལས་འགུལ་ཡང་གང་མང་སྤེལ་ཏེ་རྒྱ་གར་གཙོས་རྒྱལ་སྤྱིའི་སྤྱི་ཚོགས་ནང་བོད་དོན་དྲིལ་བསྒྲགས་རྒྱ་གང་ཆེ་སྤེལ་བཞིན་ཡོད་ལགས་ན། རང་རེའི་ཆོལ་གསུམ་སྤུན་ཟླ་ཚང་མས་ཕྱི་དགྲ་ལ་ཁ་གཏད་གདོང་ལེན་དང་ནང་སྤུན་ཟླའི་མཛའ་མཐུན་ལ་དད་དམ་ལྷད་མེད་ཐོག་བོད་དོན་ལས་འགུལ་ནང་མཉམ་ཞུགས་ཀྱིས་ནུས་པ་མཉམ་སྤུང་གནང་སྐྱོང་ཡོང་བར་འབོད་སྐུལ་ཞུ་རྒྱུ་ཡིན།

དམིགས་བསལ་འདི་ལོར་བོད་མི་རིགས་ཀྱི་འཐབ་རྩོད་དང་ངོ་བོ་གསོན་གནས་སོགས་ལ་བཀའ་དྲིན་གཞལ་མཐའ་བྲལ་བའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གོ་སྟོན་ཡིན་པར་སོང་ཁོང་ལ་བཀའ་དྲིན་རྗེས་དྲན་དང་འཁྲུངས་སྐར་གྱི་ཕྱག་རྟགས་ཆེ་ཤོས་ནི་དོན་དམ་པའི་གཞིས་ལུས་བོད་མིའི་མགྲིན་ཚབ་པ་ཞིག་དང་བོད་མིའི་ནང་ཁུལ་ཆིག་སྒྲིལ་གནང་རྒྱུ་དེ་ཡིན་པས་ཆོལ་གསུམ་སྤུན་ཟླ་ཚང་མས་དེ་དོན་དགོངས་བཅང་གིས་ལག་བསྟར་དོན་འཁྱོལ་ཡོང་རྒྱུར་རེ་སྐུལ་སྙིང་ནས་ཞུ།

མཐའ་དོན་བོད་མིའི་བླ་ན་མེད་པའི་དབུ་ཁྲིད། འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཁྲི་ལོར་བརྟན་པ་དང་ཐུགས་ཀྱི་བཞེད་དགོངས་མཐའ་དག་འགེག་མེད་ལྷུན་གྲུབ་དང་། བོད་རང་བཙན་གྱི་བདེན་མཐའ་སེལ་ཏེ་གཞིས་བྱེས་མཉམ་འཛོམས་ཀྱི་ཉི་མ་མགྱོགས་ནས་མྱུར་དུ་ཤར་བའི་སྨོན་འདུན་དང་བཅས། །

བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས།

བོད་རྒྱལ་ལོ་ ༢༡༥༡ ཕྱི་ལོ་ ༢༠༢༥ ཟླ་ ༣ ཚེས་ ༡༠ ཉིན།

བོད་ཀྱི་གཞོན་ནུ་ལྷན་ཚོགས་ཀྱི་ཐའེ་ཝན་བོད་དོན་དྲིལ་བསྒྲགས།

ཟླ་གཉིས་པ། 10, 2025ཟླ་གཉིས་པ། 25, 2025 Tenzin Lobsang གཟེངས་རྟགས།, གལ་ཆེན་གནད་དོན་ཁག, གསར་འགྱུར།, གསར་འགོད་གསལ་བསྒྲགས།, ཉེ་བའི་གསར་འགྱུར།, བོད་ཀྱི་གསར་འགྱུར།, བོད་དོན་ཞུ་གཏུགས་ལས་འགུལ།, ལས་འགུལ།, ལོ་འཁོར་ལས་འགུལ། Leave a comment

བོད་ཀྱི་གཞོན་ནུ་ལྷན་ཚོགས་ཀྱི་ཐའེ་ཝན་བོད་དོན་དྲིལ་བསྒྲགས།

བོད་ཀྱི་གཞོན་ནུ་ལྷན་ཚོགས་ཀྱིས་ཐའེ་ཝན་ནང་བོད་དོན་དྲིལ་བསྒྲགས་ལས་འགུལ་གྱི་ཉིན་གཉིས་པ་ཕྱི་ལོ་ ༢༠༢༥ ཟླ་ ༢ ཚེས་ ༤ ཉིན་གཞོན་ལྷན་སྤྱི་ཁྱབ་ཚོགས་གཙོ་མཆོག་དང་དྲིལ་བསྒྲགས་འགན་འཛིན་རྣམ་གཉིས་ནས་ཐའེ་ཝན་བོད་ཀྱི་སྐུ་ཚབ་དོན་གཅོད་སྐུ་ངོ་སྐལ་བཟང་རྒྱལ་མཚན་མཆོག་དང་མཇལ་འཕྲད་ཀྱིས་ཐའེ་ཝན་ནང་གཞོན་ལྷན་གྱི་བོད་དོན་དྲིལ་བསྒྲགས་ལས་རིམ་རྣམས་སྙན་གསེང་ཞུས་ཡོད་པ་དང་། སྐུ་ངོ་མཆོག་ནས་ཀྱང་འཚམས་འདྲི་དང་སྦྲགས་ལས་རིམ་རྣམས་འཆར་གཞི་བཞིན་ལམ་ལྷོངས་ལེགས་གྲུབ་ཡོང་རྒྱུར་རེ་བ་ཡོད་ཅེས་གསུང་གནང་ཡོད། སྐབས་དེར་གཞོན་ལྷན་ས་གནས་ཚོགས་གཙོ་ཟུར་པ་དང་བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་སྤྱི་ཁྱབ་དྲུང་ཆེ་བཀྲིས་ཚེ་རིང་ལགས་ཀྱང་མཉམ་ཞུགས་གནང་ཡོད། ཉིན་རྒྱབ་ཐའེ་ཝན་གྱི་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་ཐུག་འཕྲད་ཀྱིས་བོད་དོན་འཐབ་རྩོད་དང་མཉམ་རུབ་ཐོག་དགྲ་བོ་རྒྱ་དམར་སྲིད་གཞུང་ལ་ཁ་གཏད་གདོང་ལེན་བྱེད་ཕྱོགས་སོགས་ཀྱི་ཐད་གོ་བསྡུར་སྦྱང་བཤད་ཞུ་རྒྱུ་བྱུང་ཡོད།

ཕྱི་ལོ་ ༢༠༢༥ ཟླ་ ༢ ཚེས་ ༥ ཉིན་བོད་དང་ཐའེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གིས་ལོ་ལྟར་གོ་སྒྲིག་ཞུ་བཞིན་པའི་བོད་དོན་རྐང་འཁོར་སྐོར་སྐྱོད་ཐེངས་ ༡༥ པའི་ནང་གཞོན་ལྷན་སྤྱི་ཁྱབ་ཚོགས་གཙོ་དང་དྲིལ་བསྒྲགས་འགན་འཛིན་རྣམ་གཉིས་མཉམ་ཞུགས་གནང་ཡོད་པ་མ་ཟད། གཞོན་ལྷན་སྤྱི་ཁྱབ་ཚོགས་གཙོ་མཆོག་ནས་ཐའེ་ཝན་བོད་དོན་རྒྱབ་སྐྱོར་བ་རྣམས་ལ་བཀའ་དྲིན་ཆེ་ཞུ་དང་། བོད་ཀྱི་གཞོན་ནུ་ལྷན་ཚོགས་ནས་བོད་རྒྱལ་ཁབ་ཀྱི་རང་བཙན་སླར་གསོ་མ་ཐུབ་བར་དགྲ་བོ་རྒྱ་དམར་སྲིད་གཞུང་ལ་འགོག་རྒོལ་དང་བོད་དོན་འཐབ་རྩོད་མུ་མཐུད་གནང་རྒྱུ་ཡིན་པའི་གསུང་བཤད་གནང་ཡོད། སྐབས་དེའི་གསར་འགོད་ལྷན་ཚོགས་སྐབས་ཐའེ་ཝན་གྲོས་ཚོགས་འཐུས་མི་སྐུ་ཞབས་པུ་མ་ཧྲིན་མཆོག་དང་གྲོས་ཚོགས་འཐུས་མི་ལྕམ་སྐུ་པེ་ཡུ་རྣམ་གཉིས་ནས་ཀྱང་བོད་དོན་རྒྱབ་སྐྱོར་གྱི་གསུང་བཤད་གནང་ཡོད། བོད་དོན་རྐང་འཁོར་སྐོར་སྐྱོད་དེ་བཞིན་ཐོག་མར་བོད་དོན་ལས་འགུལ་བ་དང་གཞོན་ལྷན་ས་གནས་ཀྱི་ཚོགས་ཟུར་བཀྲིས་ཚེ་རིང་ལགས་ནས་དབུ་འཛུགས་གནང་ཡོད། ཉིན་རྒྱབ་གཞོན་ལྷན་སྤྱི་ཁྱབ་ཚོགས་གཙོ་མཆོག་ནས་ཁྲེན་ཆི་རྒྱལ་ཡོངས་གཙུག་ལག་སློབ་གཉེར་ཁང་གི་སློབ་ཕྲུག་ཚོར་གཞོན་ལྷན་སྒྲིག་འཛུགས་ངོ་སྤྲོད་དང་བོད་དོན་འཐབ་བརྩོད་སྐོར་གསུང་བཤད་གནང་ཡོད། སྐབས་དེར་ཐའེ་ཝན་དང་བོད་ཀྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་རྒྱུན་ལས་བཀྲིས་ཚེ་རིང་ལགས་དང་ཤེས་ཉེན་ལགས་རྣམ་གཉིས་ཀྱང་མཉམ་ཞུགས་གནང་ཡོད།

ཕྱི་ལོ་ ༢༠༢༥ ཟླ་ ༢ ཚེས་ ༧ ཉིན་ཐའེ་ཝན་དང་བོད་ཀྱི་འགྲོ་བ་མིའི་ཐོབ་ཐང་འབྲེལ་མཐུད་ལྷན་ཁང་གིས་གོ་སྒྲིག་འོག་གཞོན་ལྷན་སྤྱི་ཁྱབ་ཚོགས་གཙོ་མཆོག་དང་དྲིལ་བསྒྲགས་འགན་འཛིན་རྣམ་གཉིས་ནས་ཐའེ་ཝན་དཔེ་དེབ་དུས་སྟོན་ཐོག་གཏམ་བཤད་སྤེལ་ཡོད་པ་མ་ཟད། དེའི་རྗེས་གཞོན་ལྷན་སྤྱི་ཁྱབ་ཚོགས་གཙོ་མཆོག་ནས་ཐའེ་ཝན་གསར་འགྱུར་རྒྱུད་ལམ་ཁག་གི་བཅར་འདྲིར་དང་ལེན་ཞུས་གནང་ཡོད། ཕྱི་དྲོ་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་གཞོན་ལྷན་སྐུ་ཚབ་གཙོས་བཀྲིས་ཚེ་རིང་ལགས་དང་ས་གནས་གཞོན་ལྷན་གྱི་ཚོགས་གཙོ་དཀོན་མཆོག་ལགས་བཅས་ལ་དགོང་དྲོའི་གསོལ་ཚིགས་འདེགས་འབུལ་གྱིས་སྣེ་ལེན་ཞུས་གནང་བར་གཞོན་ལྷན་སྤྱི་ཁྱབ་ཚོགས་གཙོ་མཆོག་ནས་སྐུ་ངོ་སྐལ་བཟང་རྒྱལ་མཚན་ལགས་དབུས་ཕྱག་རོགས་ཡོངས་ལ་བཀའ་དྲིན་ཆེ་ཞུས་གནང་ཡོད།

བོད་ཀྱི་གཞོན་ནུ་ལྷན་ཚོགས་ནས་ཐའེ་ཝན་ནང་བོད་དོན་དྲིལ་བསྒྲགས་དང་ཞུ་གཏུགས་ལས་འགུལ་གྱི་སྤྱི་ཚེས་ ༥ ཉིན་གྱི་བོད་དོན་རང་དབང་རྐང་འཁོར་སྐོར་སྐྱོད་སྐབས་ཐའེ་ཝན་གྲོས་ཚོགས་འཐུས་མི་སྐུ་ཞབས་པུ་མ་ཧྲེང་དང་གྲོས་ཚོགས་འཐུས་མི་པེཡུ་ཆེན་གཉིས་དང་མཇལ་འཕྲད་གནང་ཡོད་པ་དང་། སྤྱི་ཚེས་ ༧ ཉིན་གྱི་སྔ་དྲོ་ཐའེ་ཝན་ནང་རྟེན་གཞི་བྱས་པའི་གཞུང་འབྲེལ་མིན་པའི་ཚོགས་པ་ཁག་ཅིག་གི་ཚོགས་གཙོ་དང་རྒྱུན་ལས་རྣམ་པ་དང་ཐུག་འཕྲད་ཀྱིས་བོད་དོན་འཐབ་རྩོད་གཙོས་བོད་ནང་གི་ཛ་དྲག་གནས་སྟངས་དང་མཉམ་རུབ་ངང་ལས་འགུལ་སྤེལ་ཕྱོགས་སོགས་ཀྱི་ཐད་གོ་བསྡུར་གང་ལེགས་བྱུང་ཡོད། དེའི་རྗེས་ཐའེ་ཝན་གྱི་བློན་ཆེན་སྐུ་ཞབས་ལིན་མིན་ཧྲན་མཆོག་དང་ཐའེ་ཝན་རྒྱལ་ཡོངས་འགྲོ་བ་མིའི་ཐོབ་ཐང་ལྷན་ཁང་གི་སྤྱི་ཁྱབ་འགན་འཛིན་སྐུ་ཞབས་ཀའོ་ཡུན་ཆེན་རྣམ་གཉིས་བློན་ཆེན་ལས་ཁུངས་སུ་མཇལ་འཕྲད་ཀྱིས་གཞོན་ལྷན་སྒྲིག་འཛུགས་ཀྱི་ལས་དོན་ཁག་གཅིག་སྙན་གསེང་དང་བོད་ནང་གི་ཛ་དྲག་གནས་སྟངས། གཞན་ཡང་ཐའེ་ཝན་ནས་བོད་དོན་འཐབ་རྩོད་ཐོག་རྒྱབ་སྐྱོར་སྔར་ལྷག་གནང་མུས་ཡིན་པར་བཀའ་དྲིན་ཆེ་ཞུ་གཙོས་རྒྱ་དམར་སྲིད་གཞུང་གིས་རྒྱ་སྐྱེད་རིང་ལུགས་ཀྱི་སྲིད་བྱུས་ལ་མཉམ་རུབ་ཀྱིས་ཁ་གཏད་གདོང་ལེན་གནང་ཕྱོགས་སོགས་ཀྱི་ཐད་གོ་བསྡུར་ཞུ་རྒྱུ་བྱུང་ཡོད།

དེའི་རྗེས་གཞོན་ལྷན་སྤྱི་ཁྱབ་ཚོགས་གཙོ་མཆོག་ནས་ DW ཞེས་པའི་གསར་ཁང་གི་བཅར་འདྲིར་དང་ལེན་གནང་སྟེ་ཡན་ལག་ལས་ཁུངས་སུ་ཆེད་བཅར་གནང་རྗེས་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འགན་འཛིན་གཞོན་པ་དང་གྲོས་ཚོགས་འཐུས་མི་ཝུ་པའེ་ཡི་མཆོག་དང་མཇལ་འཕྲད་ཀྱིས་ཁོང་ཉིད་ནས་ད་བར་བོད་དོན་རྒྱབ་སྐྱོར་གནང་བར་བཀའ་དྲིན་ཆེ་ཞུས་གནང་ཡོད་པ་མ་ཟད། མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་གནང་ཡོད།

དེའི་དགོང་མོར་གཞོན་ལྷན་སྤྱི་ཁྱབ་ཚོགས་གཙོ་མཆོག་དང་དྲིལ་བསྒྲགས་འགན་འཛིན་རྣམ་གཉིས་རེས་གཟའ་པ་སངས་གཏམ་གླེང་ལེ་ཚན་ནང་གདན་ཞུས་གནང་བ་བཞིན་ཆེད་བཅར་གྱིས་བོད་ཀྱི་གནད་དོན་གཙོས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་དང་འབྲེལ་བའི་བརྙན་དཔར་ཕྱོགས་བསྒྲིགས་རྣམས་གཟིགས་འབུལ་གྱིས་གཙོ་སྐྱོང་བ་དང་ཚོགས་ཞུགས་པ་རྣམ་པའི་དྲི་བར་ལན་འདེབས་གསལ་བཤད་གནང་ཡོད། སྐབས་དེར་ཆུ་ཚོད་གཉིས་ཀྱི་ལས་རིམ་ནང་ཐའེ་ཝན་བོད་ཀྱི་སྐུ་ཚབ་དོན་གཅོད་སྐུ་ངོ་སྐལ་བཟང་རྒྱལ་མཚན་ལགས་ཀྱང་མཉམ་ཞུགས་གནང་ཡོད།

ཕྱི་ལོ་ ༢༠༢༥ ཟླ་ ༢ ཚེས་ ༨ ཉིན་གཞོན་ལྷན་གྱི་སྐུ་ཚབ་རྣམ་གཉིས་དང་ཐའེ་ཝ་དང་བོད་ཀྱི་འགྲོ་བ་མིའི་ཐོབ་ཐང་འབྲེལ་མཐུད་ལས་ཁུངས་ཀྱི་ཚོགས་གཙོ་གཙོས་བཀྲིས་ཚེ་རིང་ལགས་དང་ཤེས་ཉིད་ལགས། པེན་ཧྲུ་ལགས་བཅས་དང་ལྷན་ཉིན་གུང་གསོལ་ཚིགས་མཉམ་རོལ་གྱི་ལྷན་འཛོམས་ཞིག་གོ་སྒྲིག་གནང་ཡོད་པ་དང་། སྐབས་དེར་གཞོན་ལྷན་སྤྱི་ཁྱབ་ཚོགས་གཙོ་མཆོག་ནས་ཚོགས་པ་གཉིས་ཀྱི་འབྲེལ་ལམ་དམ་ཟབ་ཡོད་ཚུལ་གཙོས་དམིགས་བསལ་ཚོགས་པ་དེ་ཉིད་ཀྱིས་ད་ལེན་གྱི་བོད་དོན་ལས་འགུལ་ལ་མཐུན་འགྱུར་རྒྱབ་སྐྱོར་གང་ལེགས་གནང་བར་བཀའ་དྲིན་ཆེ་ཞུས་གནང་ཡོད།

ཕྱི་ལོ་ ༢༠༢༥ ཟླ་ ༢ ཚེས་ ༩ ཉིན་གཞོན་ལྷན་སྤྱི་ཁྱབ་ཚོགས་གཙོ་མཆོག་དང་དྲིལ་བསྒྲགས་འགན་འཛིན་རྣམ་གཉིས་ནས་ཐའེ་ཝན་གྱི་ (Ministry of Labor) དང་ཐའེ་ཝན་གྲོས་ཚོགས་འཐུས་མི་བོད་དོན་རྒྱབ་སྐྱོར་བའི་ཚོགས་གཙོ་བོད་དོན་རྒྱབ་སྐྱོར་བ་སྐུ་ཞབས་ཧུན་ཧྲེན་ཧེན་མཆོག་བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་ལྷན་ཁང་གི་ལས་ཁུངས་སུ་མཇལ་འཕྲད་གནང་ཡོད། སྐབས་དེར་གནད་དོན་འདྲ་མིན་ཐད་གོ་བསྡུར་དང་གཞོན་ལྷན་སྤྱི་ཁྱབ་ཚོགས་གཙོ་མཆོག་ནས་གྲོས་ཚོགས་འཐུས་མི་མཆོག་ལ་བཀའ་དྲིན་ཆེ་ཞུས་གནང་ཡོད། ཐའེ་ཝན་ནང་ད་ལེན་བོད་ཀྱི་གཞོན་ནུ་ལྷན་ཚོགས་ཀྱི་བོད་དོན་དྲིལ་བསྒྲགས་དང་ཞུ་གཏུགས་ཀྱི་ལས་འགུལ་གང་ལེགས་བྱུང་ཏེ་རྒྱ་གར་དུ་ཕྱིར་ལོག་གནང་སྐབས་ཐའེ་ཝན་དང་བོད་ཀྱི་འགྲོ་བ་མིའི་ཐོབ་ཐང་ལྷན་ཁང་གི་སྤྱི་ཁྱབ་དྲུང་ཆེ་བཀྲ་ཤིས་ཚེ་རིང་མཆོག་དང་ཐའེ་ཝན་ས་གནས་གཞོན་ལྷན་གྱི་ཚོགས་གཙོ་ཀོན་མཆོག་ལག་རྣམ་གཉིས་ནས་ཕེབས་སྐྱེལ་ཞུས་གནང་ཡོད།

བོད་ཀྱི་གཞོན་ནུ་ལྷན་ཚོགས་ཀྱི་ལོ་རྒྱུས་རང་བཞིན་རྒྱ་གར་རྒྱལ་ཡོངས་སྦག་སྦག་སྐོར་སྐྱོད་ལས་འགུལ།

ཟླ་དང་པོ། 24, 2025ཟླ་གཉིས་པ། 25, 2025 Tenzin Lobsang གཟེངས་རྟགས།, གལ་ཆེན་གནད་དོན་ཁག, གསར་འགྱུར།, གསར་འགོད་གསལ་བསྒྲགས།, ཉེ་བའི་གསར་འགྱུར།, བོད་ཀྱི་གསར་འགྱུར།, བོད་དོན་ཞུ་གཏུགས་ལས་འགུལ།, ལས་འགུལ།, ལོ་འཁོར་ལས་འགུལ། Leave a comment

བོད་ཀྱི་གཞོན་ནུ་ལྷན་ཚོགས་ཀྱི་ལོ་རྒྱུས་རང་བཞིན་རྒྱ་གར་རྒྱལ་ཡོངས་སྦག་སྦག་སྐོར་སྐྱོད་ལས་འགུལ།

བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་ཕྱི་ལོ་ ༢༠༢༤ ཟླ་ ༡༡ ཚེས་ ༢༢ ནས་བཟུང་རྒྱ་གར་བྱང་ཤར་ཁུལ་གྱི་ཨ་རུ་ན་ཅལ་མངའ་སྡེའི་ཧིན་བོད་གཉིས་ཀྱི་ས་མཚམས་འབུམ་ལ་ནས་དབུ་འཛུགས་ཐོག་རྒྱ་གར་རྒྱལ་ཡོངས་ཀྱི་མངའ་སྡེ་ ༢༠ དང་གྲོང་ཁྱེར་ཆེ་ཁག་ ༡༡༠ ལྷག བོད་མིའི་དགུན་ཚོང་ཁྲོམ་ས་དང་གཞིས་ཆགས་ ༡༠༠ ལྷག་ཙམ་ནང་སྦག་སྦག་སྐོར་སྐྱོད་ཀྱི་ལས་འགུལ་བརྩམས་ཏེ་རྒྱ་གར་ཨ་རུ་ན་ཅལ་མངའ་སྡེའི་བློན་ཆེན་སྐུ་ཞབས་པདྨ་མཁའ་འགྲོ་མཆོག་དང་། བྷི་ཧར་མངའ་སྡེའི་སྲིད་སྐྱོང་སྐུ་ཞབས་ར་ཇེན་དར་ནཌ་ཨར་ལི་ཀར་མཆོག གཞན་ཡང་རྒྱ་གར་གྱི་ཆབ་སྲིད་ཚོགས་པ་འདྲ་མིན་གྱི་དཔོན་རིགས་ཁག། རྒྱ་གར་དབུས་དང་མངའ་སྡེའི་གྲོས་ཚོགས་འཐུས་མི་དང་། བོད་དོན་རྒྱབ་སྐྱོར་བ་གཙོས་ས་གནས་ཀྱི་གསར་འགོད་པ་དང་འབྲེལ་ཡོད་དཔོན་རིགས་ཁག་ལ་མཇལ་འཕྲད་ཀྱིས་ད་ལྟའི་ཆར་དགྲ་བོ་རྒྱ་དམར་སྲིད་གཞུང་གིས་བོད་ནང་བོད་ཀྱི་ཆོས་དང་རིག་གཞུང་མི་རིགས་དང་བཅས་པ་རྩ་མེད་བཟོ་རྒྱུའི་སྲིད་བྱུས་འདྲ་མིན་ཞིག་ལག་བསྟར་བྱེད་མུས་ཀྱིས་བོད་ཕྲུག་རྣམས་བཙན་གྱིས་གཏན་འཇགས་སློབ་གྲྭའི་ནང་བཙན་འཇུག་བྱེད་པ་དང་། བོད་མི་རིགས་ཀྱི་སྐད་ཡིག་དང་རིག་གཞུང་མི་ཉམས་རྒྱུན་འཛིན་གནང་མཁན་གྱི་དགེ་རྒན་དང་། ཤེས་ཡོན་པ་རྣམས་ལ་མ་ཉེས་ཁག་གཡོག་གིས་ཉེས་མིང་སྣ་ཚོགས་བཏགས་ཏེ་འཛིན་བཟུང་བཙོན་འཇུག་བྱས་དང་བྱེད་མུས་ཐོག་སྒེར་གྱི་སློབ་གྲྭ་རྣམས་བཙན་གྱི་སྒོ་རྒྱབ་བཞིན་པའི་ཛ་དྲག་གི་གནས་སྟངས་གཙོས་དགོན་སྡེ་ཁག་གི་གྲྭ་བཙུན་རྣམས་དགོན་པ་ནས་ཕྱིར་ཕུད་ཀྱིས་གཏན་འཇགས་སློབ་གྲྭའི་ནང་བཙན་འཇུག་སོགས་བྱས་ཏེ་བོད་མི་རིགས་ཀྱི་ངོ་བོ་རྩ་མེད་བཟོ་བཞིན་པའི་ཛ་དྲག་གནས་སྟངས་ཐོག་རྒྱ་གར་གཞུང་དམངས་གཉིས་གཙོས་རྒྱལ་སྤྱིའི་སྲིད་གཞུང་དང་། དེ་མིན་གཞུང་འབྲེལ་མིན་པའི་ཚོགས་པ་ཁག་ནས་ཐུགས་སྣང་དང་དེ་དག་མཚམས་འཇོག་དགོས་པའི་གནོན་ཤུགས་སྤྲོད་རྒྱུར་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་ཡོད་པ་མ་ཟད།

བོད་རྒྱལ་ཁབ་ཆེན་པོ་འདི་བཞིན་མི་ལོ་སྟོང་ཕྲག་དུ་མར་རང་བཙན་གྱི་གནས་བབ་ཐོག་རང་ས་རང་སྲུང་བྱས་ཏེ་ཁྱིམ་མཚེས་རྒྱལ་ཁབ་རྣམས་ལ་འབྲེལ་ལམ་ཟབ་མོ་ཉར་ཡོད་ན་ཡང་དགྲ་བོ་རྒྱ་དམར་སྲིད་གཞུང་ནས་བོད་ས་བཙན་བཟུང་བྱས་ཏེ་ཧིན་བོད་གཉིས་ཀྱི་ས་མཚམས་བརྟན་ལྷིང་མེད་པ་བཟོས་ཡོད་པ་མ་ཟད། དགྲ་བོ་རྒྱ་དམར་སྲིད་གཞུང་ནས་རྒྱ་སྐྱེད་རིང་ལུགས་ཀྱི་སྲིད་བྱུས་འོག་དུས་ནས་དུས་སུ་རྒྱ་གར་གྱི་ས་ཐོག་ཏུ་སིམ་འཛུལ་དང། དམག་འཐབ་སོགས་བྱེད་མུས་དང། ཧིན་བོད་གཉིས་ཀྱི་ས་མཚམས་ཁུལ་དུ་འཛུགས་སྐྲུན་ལས་གཞི་གང་མང་ཞིག་འགྲོ་བཞིན་ཡོད་པར་སོང་། ལས་གཞི་དེའི་རིགས་ཀྱིས་རྒྱ་གར་གྱི་བདེ་འཇགས་ལ་ཡང་ཉེན་ཁ་བཟོ་བཞིན་ཡོད་པས་རྒྱ་གར་གཞུང་དམངས་གཉིས་ནས་ཀྱང་དགྲ་བོ་རྒྱ་དམར་སྲིད་གཞུང་གི་བྱ་སྤྱོད་དེ་རིགས་ལ་དོ་སྣང་ཡིད་གཟབ་ནན་པོ་དགོས་པའི་འབོད་སྐུལ་ཞུས་པ། དམིགས་བསལ་བོད་རང་བཙན་ནི་རྒྱ་གར་གྱི་བདེ་འཇགས་ཡིན་པས་རྒྱ་གར་གཞུང་དམངས་གཉིས་ནས་བོད་ནི་ལོ་རྒྱུས་ཐོག་རང་བཙན་གྱི་རྒྱལ་ཁབ་ཅིག་ཡིན་པར་ངོས་འཛིན་དང་དམིགས་བསལ་ལོ་རྒྱུས་ཐོག་ཧིན་བོད་གཉིས་ཀྱི་ས་མཚམས་ལས་རྒྱ་དཀར་ནག་གཉིས་ཀྱི་ས་མཚམས་ཟེར་བ་ཞིག་རྩ་བ་ནས་མེད་ཚུལ་སོགས་ཀྱི་ཐད་གྲོས་ཆོད་གཏན་འབེབས་ཡོང་རྒྱུར་འབོད་སྐུལ་ཡང་ཞུས་ཡོད།

དམིགས་བསལ་དགྲ་བོ་རྒྱ་དམར་སྲིད་གཞུང་ནས་འཛུགས་སྐྲུན་གྱི་ལས་གཞི་འདྲ་མིན་ལ་ཁ་གཡར་ཏེ་བོད་མདོ་དབུས་ཁམས་གསུམ་གྱི་ས་ཁུལ་འདྲ་མིན་ནས་གཏེར་ཁ་སྔོག་འདོན་བྱས་ཏེ་རི་ཆུ་ནགས་གསུམ་གྱི་རང་བྱུང་ཁོར་ཡུག་ལ་དོ་ཕོག་ཚབས་ཆེན་བཟོ་བཞིན་ཡོད་པ་དང་། ལོ་རྒྱུས་རང་བཞིན་གྱི་རྩ་ཆེའི་གནས་རི་དང་དགོན་པ་སོགས་རྩ་གཏོར་བཏང་དང་གཏོང་མུས་ཡིན་པ་མ་ཟད། ད་ལྟའི་ཆར་འབྲི་ཆུའི་བཞུར་རྒྱུན་དུའང་ཆུ་རགས་གསར་རྒྱག་གི་ལས་གཞི་འདྲ་མིན་ཞིག་ལག་བསྟར་བྱེད་མུས་ཀྱིས་བོད་མིའི་འཚོ་གནས་ལ་རྡབ་གསིག་དང་ཉེན་ཁ་ཚབས་ཆེ་སྤྲད་པ་ཙམ་མ་ཡིན་པར། འབྲི་ཆུའི་བཞུར་རྒྱུན་དུ་འཚོ་གནས་བྱེད་བཞིན་པའི་ཉེ་འབྲེལ་རྒྱལ་ཁབ་གཞན་ལ་ཡང་ཉེན་ཁ་དང་དཀའ་ངལ་གཅིག་མཚུངས་སུ་སྤྲད་དང་སྤྲོད་མུས་ཡིན་པས་འབྲེལ་ཡོད་རྒྱལ་ཁབ་གཞན་ཚོའི་ངོས་ནས་ཀྱང་བོད་ནང་གི་ཛ་དྲག་གནས་སྟངས་ལ་ཐུགས་སྣང་ཡོང་རྒྱུར་རེ་བ་ཞུས་ཏེ་ལས་འགུལ་བ་རྣམས་ནས་ཁྱོན་རྒྱང་ཚད་སྤྱི་ལེ་ )20,000 KM ) ལྷག་འགྲུལ་བཞུད་གནང་ཡོད་པ་མ་ཟད། རྒྱ་གར་གྱི་གསར་འགྱུར་རྒྱུད་ལམ་ཁག་གཅིག་སྟོང་(༡༠༠༠) ལྷག་གི་ནང་བོད་དོན་དྲིལ་བསྒྲགས་གནང་ཐུབ་པ་བྱུང་ཡོད། གཞན་ཡང་རྒྱ་གར་གྱི་བོད་དོན་རྒྱབ་སྐྱོར་བ་ཚོགས་པ་འདྲ་མིན་ཞིག་དང་ཐུག་འཕྲད་ཀྱིས་བོད་ནང་གི་ཛ་དྲག་གནས་སྟངས་གསལ་བཤད་དང་ཕན་ཚུན་ངོ་སྤྲོད་སོགས་གནང་ཏེ་མ་འོངས་པར་མཉམ་རུབ་ཀྱི་ལས་འགུལ་གང་མང་སྤེལ་ཐབས་གནང་རྒྱུར་རེ་སྐུལ་ཡང་ཞུས་གནང་ཡོད། སྤྱིར་ལས་འགུལ་གྱི་བརྒྱུད་རིམ་ནང་ལས་འགུལ་བ་ཁག་གཅིག་བརྡབ་སྐྱོན་གྱི་དཀའ་ངལ་ཕྲན་བུ་བྱུང་ཡང་ཕྱོགས་ཡོངས་ནས་རྒྱ་གར་གཙོས་རྒྱལ་སྤྱིའི་སྤྱི་ཚོགས་ནང་བོད་དོན་དྲིལ་བསྒྲགས་དང་བོད་མིའི་གནས་སྡོད་གཞིས་ཆགས་དང་ཁྲོམ་ས་སོགས་ལ་ཡང་སྐོར་སྐྱོད་ཀྱིས་བོད་རིགས་ནང་ཁུལ་ཆིག་སྒྲིལ་དགོས་གལ་དང་། གཞན་ཡང་འཐབ་རྩོད་ཀྱི་ལས་འགུལ་ཐོག་ནུས་པ་མཉམ་སྤུང་དགོས་གལ་སོགས་ཀྱི་ཐད་འབོད་སྐུལ་ནན་པོ་ཞུ་རྒྱུ་བྱུང་ཡོད། བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་ཞུས་པའི་ལོ་རྒྱུས་རང་བཞིན་གྱི་རྒྱ་གར་རྒྱལ་ཡོངས་བོད་དོན་དྲིལ་བསྒྲགས་སྦག་སྦག་སྐོར་སྐྱོད་ལས་འགུལ་གྱི་ཉིན་མཐའ་མའི་མཇུག་བསྡོམས་མཛད་སྒོ་དེ་བཞིན་ལྡི་ལི་བོད་སྒར་བསམ་ཡས་གླིང་གི་བོད་ཁྱིམ་ཉིན་སློབ་ཏུ་ཚོགས་ཡོད་པ་དང་། སྐབས་དེར་ཧིན་བོད་གཉིས་ཀྱི་ཚོགས་པ་སྐྱིད་སྡུག་ཁག་གི་སྐུ་ཚབ་རྣམ་པ་དང་ཆོལ་གསུམ་བོད་རིགས་མང་ཚོགས་རྣམས་དང་། བོད་དོན་རྒྱབ་སྐྱོར་བ་བཅས་ནས་འཚམས་འདྲི་དང་དགའ་བསུའི་ཁ་བཏགས་དང་མེ་ཏོག་སོགས་གཡོགས་ཏེ་ཕེབས་བསུའི་སྣེ་ལེན་ཞུས་གནང་ཡོད་པ་མ་ཟད། ཆེད་དུ་མགྲོན་འབོད་ཞུས་པའི་བོད་དོན་རྒྱབ་སྐྱོར་བ་གནད་ཡོད་རྣམས་ནས་ཡི་རང་བསྔགས་བརྗོད་དང་བོད་དོན་རྒྱབ་སྐྱོར་གྱི་གཏམ་བཤད་དང་། གཞོན་ལྷན་སྤྱི་ཁྱབ་ཚོགས་གཙོ་མཆོག་ནས་ཀྱང་ཟླ་བ་གཉིས་ལྷག་རིང་གི་ལས་འགུལ་སྐབས་རྒྱ་གར་གྱི་དབུས་སའི་དཔོན་རིགས་ཁག་མང་དག་ཅིག་མཇལ་འཕྲད་ཀྱིས་བོད་དོན་དྲིལ་བསྒྲགས་ཇི་བྱུང་། གཞན་ཡང་མངའ་སྡེའི་ཉི་ཤུའི་ནང་བརྟན་གཞི་བྱས་པའི་བོད་པའི་གཞིས་ཆགས་དང་ཁྲོམ་ས་ཁག་ཚང་མར་སྐོར་སྐྱོད་ཀྱིས་མང་ཚོགས་རྣམ་པར་ཆིག་སྒྲིལ་དང་འཐབ་རྩོད་ནང་ནུས་པ་མཉམ་སྤུངས་དགོས་གལ། བོད་ཀྱི་གཞོན་ནུ་ལྷན་ཚོགས་ནས་བོད་རང་བཙན་གྱི་བདེན་མཐའ་མ་སེལ་བར་རྒྱ་རྒོལ་གྱི་ལས་འགུལ་མུ་མཐུད་སྤེལ་རྒྱུ་ཡིན་སྐོར་སོགས་ཀྱི་ཐད་སེམས་ཚོར་ཆེན་པོས་བཀའ་སློབ་གསུང་བཤད་གནང་བ་དང་སྦྲགས། ལས་འགུལ་ནང་མཉམ་ཞུགས་གནང་མཁན་རྒྱལ་གཅེས་ལས་འགུལ་བ་རྣམས་ལ་ཐུགས་རྗེ་ཆེ་ཞུའི་ཕྱག་རྟགས་དང་གཞན་ཡང་ལས་འགུལ་གྱི་ཐོག་མཐའ་བར་གསུམ་དུ་མི་རྒྱུ་གཉིས་ཀྱི་རྒྱབ་སྐྱོར་གནང་མཁན་ཡོངས་ལ་བཀའ་དྲིན་ཆེ་ཞུས་ཀྱིས་མཇུག་བསྡོམས་མཛད་སྒོའི་ལས་རིམ་ཁག་ལེགས་གྲུབ་བྱུང་ཡོད།
ཉིན་ ༡

རྒྱ་གར་བྷི་ཧར་མངའ་སྡེའི་གྲོས་ཚོགས་གོང་མའི་ཇེ་ཌི་ཡུ་ཚོགས་པའི་འཐུས་མི་ཟུར་པ་མཆོག་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཡིག་ཚང་དུ་ཆེད་ཕེབས་གནང་བ།

ཟླ་བཅུ་པ། 14, 2024 Tenzin Lobsang གསར་འགྱུར།, ཉེ་བའི་གསར་འགྱུར།, བོད་ཀྱི་གསར་འགྱུར།, བོད་དོན་ཞུ་གཏུགས་ལས་འགུལ།, ལོ་འཁོར་ལས་འགུལ། Leave a comment

༄༅། ། ཕྱི་ལོ་ ༢༠༢༤ ཟླ་ ༡༠ པའི་ཚེས་ ༨ ཉིན་རྒྱ་གར་བྷི་ཧར་མངའ་སྡེའི་གྲོས་ཚོགས་གོང་མའི་ཇེ་ཌི་ཡུ་ཚོགས་པའི་འཐུས་མི་ཟུར་པ་སྐུ་ཞབས་ཨ་ནིལ་ཧེ་ཇི་ (Shri Anil Hegde, former Rajya Sabha MP from Bihar, JDU) མཆོག་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཡིག་ཚང་དུ་ཆེད་ཕེབས་གནང་བ་དང་། སྐབས་དེར་གཞོན་ལྷན་སྤྱི་ཁྱབ་ཚོགས་གཞོན་དང་ཟུང་དྲུང་གཉིས་ནས་ཕེབས་བསུའི་སྣེ་ལེན་ཞུས་ཏེ་སྒྲིག་འཛུགས་ཀྱི་ལས་དོན་བྱེད་ཕྱོགས་དང་བོད་ནང་གི་ཛ་དྲག་གནས་སྟངས་སོགས་ཀྱི་ཐད་གོ་བསྡུར་ལྷུག་པོ་གནང་ཡོད།

བོད་ཀྱི་གཞོན་ནུ་ལྷན་ཚོགས་དབུ་བརྙེས་ཏེ་ལོ་ངོ་ ༥༤ ཧྲིལ་པོ་འཁོར་བའི་དུས་དྲན་སྲུང་བརྩིའི་བསྒྲགས་གཏམ།

ཟླ་བཅུ་པ། 7, 2024ཟླ་བཅུ་པ། 8, 2024 Tenzin Lobsang གསར་འགྱུར།, ཉེ་བའི་གསར་འགྱུར།, ལོ་འཁོར་ལས་འགུལ། Leave a comment

བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་ལོ་ངོ་ ༥༤ ཧྲིལ་པོ་འཁོར་བའི་དུས་དྲན་གྱི་གསུང་འཕྲིན།

དེ་རིང་ནི་བོད་རྒྱལ་ལོ་ ༢༡༥༡ ཕྱི་ལོ་ ༢༠༢༤ ཟླ་ ༡༠ ཚེས་ ༧ རེས་གཟའ་ཟླ་བ་ཡིན་ཞིང་། ཉིན་མོ་འདི་ནི་བོད་ཀྱི་གཞོན་ནུ་ལྷན་ཚོགས་དབུ་བརྙེས་ཏེ་ལོ་ངོ་ ༥༤ ཧྲིལ་པོ་འཁོར་བའི་དུས་དྲན་སྲུང་བརྩི་ཞུ་བའི་ལོ་རྒྱུས་རང་བཞིན་གྱི་གལ་ཆེའི་ཉིན་མོ་ཞིག་ཆགས་ཡོད་སྟབས། ཐོག་མར་བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་དབུས་རྒྱུན་ལས་ཁང་གི་ངོས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྒོ་གསུམ་གུས་ཕྱག་གྲངས་མེད་དང་བཅས་ཐུགས་རྗེ་བཀའ་དྲིན་རྗེས་སུ་དྲན་པའི་སྒོ་ནས་བོད་རྒྱལ་ཁབ་དང་མི་རིགས་རིག་གཞུང་དང་བཅས་པའི་ཆེད་གཅེས་པའི་རང་གི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ལྷག་བསམ་དང་སྙིང་སྟོབས། བློས་གཏོང་བཅས་པར་བཀའ་དྲིན་རྗེས་དྲན་དང་མྱ་ངན་གུས་འདུད་ཞུ་རྒྱུ་མ་ཟད། ཤུལ་ལུས་ནང་མི་བུ་ཕྲུག་དང་དགའ་ཉེ་སྤུན་མཆེད་ཡོངས་ལ་གདུང་སེམས་མཉམ་སྐྱེད་ཞུ་རྒྱུ་ཡིན།

བོད་ཀྱི་གཞོན་ནུ་ལྷན་ཚོགས་ཐོག་མར་ཕྱི་ལོ་ ༡༩༧༠ ཟླ་ ༡༠ ཚེས་ ༧ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་ལམ་སྟོན་དང་བྱིན་གྱིས་བརླབས་པའི་ཐོག་དུས་སྐབས་གཞོན་སྐྱེས་ཁག་ཅིག་གིས་འགན་འཁུར་གཙོ་བཞེས་ཀྱིས་གསར་འཛུགས་གནང་བའི་གཞུང་འབྲེལ་མ་ཡིན་པའི་བོད་རང་བཙན་འཐབ་རྩོད་གནང་མཁན་གྱི་སྒྲིག་འཛུགས་རྙིང་གྲས་ཆེ་ཤོས་ཤིག་ཡིན་པ་མ་ཟད། བོད་པའི་གཞོན་སྐྱེས་རྣམས་བོད་དོན་འཐབ་རྩོད་ཐད་འགོ་ཁྲིད་ནུས་པ་སྐྱེ་སྲིང་ཡོང་སླད་རང་ཉིད་ཀྱི་ཤེས་ཡོན་དང་ལྷག་བསམ། རྣམ་དཔྱོད་བཅས་བེད་སྤྱོད་གཏོང་སའི་གལ་ཆེའི་སྡིངས་ཆ་ཞིག་ཀྱང་ཡིན། བོད་ཀྱི་གཞོན་ནུ་ལྷན་ཚོགས་ནི་སྒྲིག་གཞི་ལྡན་པའི་དབུས་སྤྱི་ཁྱབ་སྒྲིག་འཛུགས་ཤིག་ཡིན་པ་མ་ཟད། རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་ནང་ས་གནས་ཡན་ལག་དང་ཚོགས་མི་བཅས་ཡོད་པའི་རང་གཞུང་དབུས་བོད་མིའི་སྒྲིག་འཛུགས་དང་། བཙན་བྱོལ་བོད་མིའི་སྤྱི་ཚོགས་ནས་ཀྱང་ངོས་ལེན་ཡོད་པའི་སྒྲིག་འཛུགས་ཤིག་ཡིན།

བོད་ཀྱི་གཞོན་ནུ་ལྷན་ཚོགས་ཀྱི་དབུས་སའི་རྒྱུན་ལས་སྔ་ཕྱི་རིམ་བྱུང་གིས་ད་བར་བོད་བསྟན་སྲིད་མི་རིགས་ཀྱི་འཐབ་རྩོད་སླད་དཀའ་སྤྱད་འབད་བརྩོན་དང་། སྐྱིད་སྡུག་མཉམ་མྱོང་གིས་མི་ལོ་ ༥༤ རིང་རྒྱལ་སྤྱིའི་ཁྱོན་ཡོངས་ཀྱི་རྒྱ་དམར་སྲིད་གཞུང་གི་གཞུང་ཚབ་ཁང་ཁག་དང་། མཉམ་འབྲེལ་རྒྱལ་ཚོགས་ཀྱི་ལས་ཁུངས་ཁག རྒྱལ་སྤྱིའི་འགྲོ་བ་མིའི་ཐོབ་ཐང་ཚན་པ་ཁག དེ་བཞིན་རྒྱལ་སྤྱིའི་གཞུང་དང་གཞུང་འབྲེལ་མ་ཡིན་པའི་བོད་དོན་རྒྱབ་སྐྱོར་ཚོགས་སྡེ་ཁག གཞོན་ལྷན་དབུས་སའི་གནས་ཡུལ་གྱི་འབྲེལ་ཡོད་སྲིད་གཞུང་གི་གྲོས་ཚོགས་འཐུས་མི་དང་དཔོན་རིགས་ཁག་བཅས་པར་བོད་དོན་དང་འབྲེལ་བའི་ཞུ་སྙན་འབུལ་གཏུགས་དང་། དེ་བཞིན་རྒྱལ་སྤྱིའི་གྲོས་ཚོགས་འཐུས་མི་སོགས་གནད་ཡོད་སྐུ་ཚབ་འཐུས་མི་ཁག་རྒྱ་གར་གཙོས་རྒྱལ་ཁབ་ཁག་ནང་འཚམས་གཟིགས་ཕེབས་སྐྱོད་སྐབས་གཞོན་ལྷན་དབུས་ས་ཡོངས་ནས་སྣེ་ལེན་འཚམས་ཞུ་དང་འབྲེལ་བོད་ནང་གི་ཛ་དྲག་གི་གནས་སྟངས་དང་། གཞོན་ལྷན་སྒྲིག་འཛུགས་ཀྱི་ལས་དོན་སྤེལ་ཕྱོགས་སོགས་ངོ་སྤྲོད་གནང་ཐུབ་པ་བྱུང་ཡོད།

ལྷག་པར་ཚོགས་ཆེན་དང་འགན་ལྷན་རིམ་པའི་གྲོས་ཆོད་དགོངས་དོན་དུ་བོད་དོན་ཆབ་སྲིད་དང་འབྲེལ་བའི་ལས་འགུལ་ཁག་ལ་དགོས་འདུན་དོན་ཚན་དང་བཅས་མ་འཆི་བར་གྱི་ཟས་བཅད་ངོ་རྒོལ་དང་། ཞི་བའི་གོམ་བགྲོད། རྐང་འཁོར་སྐོར་བསྐྱོད། སྦག་སྦག་སྐོར་བསྐྱོད། སྤྱི་ཚོགས་ཞབས་ཞུ། དུས་དྲན་སྲུང་བརྩི། བོད་དོན་དྲིལ་བསྒྲགས་སོགས་དབུས་ས་གཉིས་ནས་དུས་མཚམས་སོ་སོར་ལས་འགུལ་སྤེལ་བརྩམས་གནང་ཐུབ་པ་བྱུང་ཡོད་པས་རྒྱལ་སྤྱིའི་སྤྱི་ཚོགས་དྲྭ་ལམ་དང་གསར་འགྱུར་རྒྱུད་ལམ་ཁག་བརྒྱུད་བོད་དོན་དྲིལ་བསྒྲགས་དང་ཁྱབ་བསྒྲགས་ཤུགས་ཆེ་བྱུང་སྟེ་རྒྱལ་སྤྱིའི་སྤྱི་ཚོགས་ནས་ཀྱང་བོད་དོན་གནས་བབ་དང་བོད་ནང་གི་ཛ་དྲག་གནས་སྟངས་སོགས་གསལ་རྟོགས་ཡོང་སླད་ཕན་རླབས་ཆེན་པོ་བྱུང་བ་དང་། བོད་དོན་བདེན་པའི་འཐབ་རྩོད་ཐད་རྒྱབ་སྐྱོར་ཐོབ་སླད་ནུས་ཕན་ལྡན་པ་བྱུང་ཡོད། ཡང་སྒོས་དགྲ་བོ་རྒྱ་དམར་སྲིད་གཞུང་ནས་ཀྱང་བོད་ཀྱི་གཞོན་ནུ་ལྷན་ཚོགས་ལ་མིག་ནང་གི་གྲ་མ་བཞིན་སྡང་ཟུག་ཆེན་པོས་འཇིགས་སྐུལ་རིང་ལུགས་པ་རེད་ཅེས་ཉེས་འཛུགས་ཀྱིས་རྫུན་སྒྲོག་ཀྱང་བྱེད་དགོས་བྱུང་ཡོད། ལྷག་པར་འདི་ལོའི་གཞོན་ལྷན་གྱི་འགན་འཛིན་ལྷན་ཚོགས་ཀྱི་གྲོས་ཆོད་དགོངས་དོན་གཞིར་བཟུང་ཐོག་བོད་དོན་ཆབ་སྲིད་ཀྱི་ལས་འགུལ་འདྲ་མིན་སྔར་ལྷག་སྤེལ་རྒྱུ་དང་། དམིགས་བསལ་འདི་ལོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལུགས་ལྟར་དགུང་གྲངས་དགུ་བཅུར་ཕེབས་པའི་གོ་སྟོན་ལ་མ་སྒྲིག་ལྷན་འགྲུབ་ཀྱིས་གཞོན་ལྷན་གྱི་ཚོགས་ཆེན་དང་འགན་ལྷན་རིམ་པར་༸གོང་ས་མཆོག་ནས་བཀའ་སློབ་རིམ་ནན་བསྩལ་ཕེབས་བྱུང་དོན་ལྟར་གཞོན་ལྷན་ནས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་ཆེན་མོ་བསོད་ནམས་རྒྱལ་མཚན་མཆོག་ལ་བོད་རང་བཙན་བདེན་དཔང་གི་ལོ་རྒྱུས་ཤིག་འབྲི་རྩོམ་གནང་རྒྱུར་རེ་སྐུལ་ཇི་ཞུས་ལྟར་ཞལ་བཞེས་ཐོབ་ནས་མི་ལོ་དྲུག་ཙམ་རིང་འབྲི་རྩོམ་གནང་བའི་བོད་རང་བཙན་བདེན་དཔང་གི་ལོ་རྒྱུས་དཔེ་དེབ་གཅིག་རིང་མིན་སྤྱི་ཚོགས་ཐོག་འགྲེམས་སྤེལ་འབྱུང་ལ་ཉེ་བ་དང་། དེ་བཞིན་བོད་དོན་འཐབ་རྩོད་དང་འབྲེལ་བའི་གཏམ་བརྗོད་སྐོར་སྐྱོད་ཀྱི་ལས་འགུལ་ཞིག་ཀྱང་སྤེལ་འཆར་ཡིན།

རྒྱ་དམར་སྲིད་གཞུང་གིས་བོད་དུ་བཙན་འཛུལ་བྱས་པ་ནས་བཟུང་ད་བར་དངོས་ཤུགས་རྒྱུད་གསུམ་དུ་ལྐོག་གཡོ་ངན་བྱུས་དང་ཐབས་བརྒྱ་ཇུས་སྟོང་གི་གདུག་རྩུབ་ཅན་གྱི་སྲིད་བྱུས་འདྲ་མིན་འོག་བོད་མི་རིགས་ཀྱི་ཆོས་དང་རིག་གཞུང་། ཡུལ་སྲོལ་གོམས་གཤིས་སོགས་ཕེལ་རྒྱས་ལ་དམ་བསྒྲགས་དང་བཀག་འགོག་བྱེད་པ། བོད་མི་རིགས་ཀྱི་རྩ་ཆེའི་དགོན་སྡེ་དང་གནས་རི་ཁག་རྩ་གཏོར་ཤུལ་མེད་བཟོ་བ། བོད་མིའི་ཆོས་དད་རང་དབང་དང་བོད་བརྒྱུད་ནང་བསྟན་ལ་སློབ་གཉེར་བྱ་རྒྱུར་དམ་བསྒྲགས་ཚོད་འཛིན་བྱེད་པ། བོད་མིའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བ། བོད་ཀྱི་སྐྱེ་ཁམས་ཁོར་ཡུག་དང་བཅས་པར་གཏོར་སྐྱོན་དང་སྦག་གཙོག་སོགས་བོད་ཀྱི་སྣོད་བཅུད་གཉིས་ལ་གཏོར་སྐྱོན་ཚབས་ཆེ་བཟོས་དང་བཟོ་བཞིན་པར་བརྟེན་ད་བར་བོད་མི་རྣམས་འུ་ཐུག་བཟོད་བྲལ་གྱིས་བོད་ཕྱི་ནང་གཉིས་ནས་བོད་མི་གྲངས་ ༡༧༠ ཙམ་གྱིས་བོད་རྒྱལ་ཁབ་དང་མི་རིགས་ཀྱི་བདེ་སྡུག་ཆེད་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གིས་རང་ལུས་མེར་སྲེག་གནང་དགོས་བྱུང་ཡོད་པ་དང་། དེ་བཞིན་རྒྱ་གཞུང་གིས་བོད་ནང་གི་བོད་ཕྲུག་བྱིས་པ་རྣམས་རང་གི་རིག་གཞུང་། ཡུལ་གོམས་གཤིས་ལུགས། ཡ་རབ་བཟང་སྤྱོད་སོགས་ལ་སློབ་གཉེར་བྱེད་པའི་འཁོར་ཡུག་མེད་པར་བཟོས་ནས་བོད་ཕྲུག་རྣམས་ནར་མ་སོན་གོང་རང་གི་ཕ་མ་དང་ཁ་བྲལ་དུ་བཏང་ནས་རྒྱ་གཞུང་གིས་ཆེད་འཛུགས་བྱས་པའི་བཅའ་སྡོད་སློབ་གྲྭའི་ནང་བཙན་འཇུག་གིས་དམར་ཤོག་གི་ལྟ་བ་བཙན་ཁྲིད་བྱས་དང་བྱེད་བཞིན་པ་དེ་ལྟར་དང་། མདོར་ན་རྒྱ་གཞུང་གིས་བོད་མི་རིགས་ངོ་བོ་རྩ་མེད་ཤུལ་མེད་དུ་བཟོས་དང་བཟོ་བཞིན་པར་བོད་ཀྱི་གཞོན་ནུ་ལྷན་ཚོགས་ནས་ངོ་རྒོལ་སྐྱོན་བརྗོད་མཐའ་གཅིག་ཏུ་བྱེད་རྒྱུ་མ་ཟད། མྱུར་དུ་མཚམས་འཇོག་དགོས་པའི་དགོས་འདུན་འདོན་བཞིན་ཡོད། ལྷག་པར་བོད་དོན་བདེན་མཐའ་མ་གསལ་བར་རྒྱ་གར་གཙོས་རྒྱལ་སྤྱིའི་ནང་བོད་དོན་འཐབ་རྩོད་ཀྱི་ལས་འགུལ་འདྲ་མིན་སྔར་ལྷག་སྤེལ་རྒྱུར་དམ་བཅའ་བརྟན་པོས་དགྲ་བོ་རྒྱ་དམར་སྲིད་གཞུང་ལ་ནམ་ཡང་ཁ་གཏད་གདོང་ལེན་བྱ་རྒྱུ་ཡིན་ཞེས་དབང་འཛིན་པ་ཚོར་ནན་བརྗོད་བྱ་རྒྱུ་ཡིན།

དེང་སྐབས་རྒྱལ་སྤྱིའི་ཐོག་རྒྱ་ནག་དམར་པོའི་སྲིད་གཞུང་གིས་མི་དང་རྒྱུ་དངོས། དེ་བཞིན་དྲྭ་རྒྱའི་རྒྱུད་ལམ་སོགས་བེད་སྤྱད་ཀྱི་རྒྱལ་སྤྱིའི་སྲིད་གཞུང་དང་ཚོགས་སྡེ་ཁག ལྷག་པར་མི་སྣ་སྒེར་གྱི་གསང་བ་སོགས་རྐུ་འཁྱེར་བྱེད་པ། དཔལ་འབྱོར་སྲིད་བྱུས་ཀྱི་གཡོ་ཇུས་ལ་བརྟེན་ནས་མགོ་སྐོར་བསླུ་ཁྲིད་དང་། མི་མང་གི་འཚེ་སྲོག་ལ་གནོད་འཚེ་གཏོང་བ། ཞི་བདེ་དང་རང་དབང་ལྡན་པའི་རྒྱལ་ཁབ་དང་མི་མང་ལའང་ཉེན་ཁ་དང་རྡབ་གསིག་བཟོས་དང་བཟོ་མུས་ཡིན་པས་མང་གཙོ་དང་རང་དབང་ལྡན་པའི་རྒྱལ་སྤྱིའི་སྲིད་གཞུང་དང་ཚོགས་པ་སྒྲིག་འཛུགས་ཁག དེ་བཞིན་མི་མང་བཅས་ནས་རྒྱ་དམར་སྲིད་གཞུང་གི་བྱས་ཉེས་དེ་རིགས་རིམ་བཞིན་དམར་རྗེན་དུ་ཐོན་མུས་ཡིན་པར་བརྟེན་རྒྱ་དམར་སྲིད་གཞུང་ལ་ཡིད་ཆེས་བློ་གཏད་བྱ་མཁན་ཇེ་ཉུང་ནས་ཇེ་ཉུང་དུ་འགྲོ་བཞིན་ཡོད། ལྷག་པར་རྒྱ་ནག་ནང་ཁུལ་དུའང་ཆབ་སྲིད་ཤོག་ཁག་དབར་གྱི་དབང་ཆ་འཐབ་རྩོད་རྣོ་ངར་ཆེ་བའི་ཁར་སྲིད་གཞུང་དང་མི་མང་བར་ཡིད་ཆེས་བརྩི་བཀུར་མེད་པར་རྒྱ་ནག་མི་མང་རྣམས་ནམ་ཡང་སྲིད་གཞུང་གི་དམ་བསྒྲགས་སྲིད་བྱུས་འོག་གནས་ཡོད་པ་དང་། མི་མང་གི་ཆོད་དད་རང་དབང་དང་། བྱང་ཨ་རིའི་སྲིད་གཞུང་ནས་བོད་དོན་ཁྲིམས་འཆར་གཏན་འབེབ་བྱུང་བ་སོགས་བོད་ཀྱི་བདེན་པའི་གནད་དོན་ཐད་རྒྱབ་སྐྱོར་ངོས་འཛིན་ཇེ་ལེགས་སུ་འགྲོ་བཞིན་ཡོད། གསར་འགྱུར་ཚན་པ་ཁག་ལའང་དམ་བསྒྲགས་སྟངས་འཛིན་ཆེ་བས་འགྲོ་བ་མིའི་ཐོབ་ཐང་གནས་སྟངས་ཐད་འཛམ་གླིང་ནང་ཆེས་སྐྱོ་ཤོས་དེ་ཡིན་པ་རེད། དེར་བརྟེན་རྒྱལ་སྤྱིའི་སྲིད་གཞུང་དང་སྤྱི་ཚོགས་ནས་རྒྱ་ནག་དམར་ཤོག་སྲིད་གཞུང་ལ་ངོས་འཛིན་ཆེ་མཐོང་ཇེ་སྡུག་ཇེ་ཞན་དུ་གྱུར་བ་དང་། ལྷག་པར་རྒྱ་ནག་ནང་ཁུལ་དུའང་མང་གཙོ་དང་རང་དབང་ལ་དགའ་བའི་གཞོན་སྐྱེས་ཇེ་མང་ནས་ཇེ་མང་དུ་འགྲོ་བཞིན་པའི་སྐབས་རྒྱལ་སྤྱི་དང་རྒྱ་ནག་གི་ཆབ་སྲིད་ཀྱི་འགྱུར་འགྲོས་དང་སྟབས་བསྟུན་གྱིས་རང་རིགས་བོད་མི་རྣམས་ཀྱིས་རྒྱལ་གཅེས་དཔའ་བོ་དཔའ་མོ་འདས་གསོན་ཡོངས་ཀྱི་རེ་འདུན་ཡིད་ལ་བཟུང་ཞིང་མཐུན་པའི་ལག་གདང་སྦྲེལ། དམིགས་འབེན་དང་ཁ་ཕྱོགས་མ་ནོར་བར་ཕྱི་དགྲ་བོར་ལྟས་ནས་གོ་སྐབས་དམ་འཛིན་གྱིས་བོད་དོན་བདེན་པའི་འཐབ་རྩོད་ཀྱི་ལས་འགུལ་ལ་ཕྱོགས་ཡོངས་ནས་ནུས་ཤུགས་གཅིག་སྒྲིལ་དགོས་རྒྱུ་ནི་དུས་རབས་ཀྱིས་སྐུལ་བའི་ལས་འགན་དང་། མི་རབས་ལ་འཁྲི་བའི་འགན་འཁྲི་ཉག་ཅིག་ཡིན་པས་ཚང་མས་བོད་སྤྱི་དོན་ལ་དགོངས་པ་ཟབ་བཞེས་ཐོག་སྔར་ལྷག་འབད་བརྩོན་གནང་རྒྱུར་འབོད་སྐུལ་ཞུ་བཞིན་ཡོད།

དེ་བཞིན་སྤྱིར་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་ཆེ་བ་དང་བྱེ་བྲག་ཏུ་བཙན་བྱོལ་བོད་མིའི་སྤྱི་ཚོགས་ནང་ཆབ་སྲིད་དང་འབྲེལ་བའི་བསམ་ཚུལ་མཐུན་མིན་སོགས་ཀྱི་སྤྱི་ཚོགས་འཁྲུག་ཆ་ཧ་ཅང་ཆེ་བའི་དུས་སྐབས་ཤིག་ཡིན་ནའང་། དེ་དག་ནི་སྤྱིར་མང་གཙོའི་སྤྱི་ཚོགས་ཤིག་གི་ནང་དགོས་ངེས་ཀྱི་རྒྱན་ཆ་ལྟ་བུ་ཞིག་ཡིན་པ་མ་ཟད། རང་དབང་ལོངས་སུ་སྤྱོད་པའི་ཐོབ་ཐང་ཞིག་ཡིན་པ་བརྗོད་མ་དགོས་མོད་ཀྱང་། དེང་སྐབས་རང་རེའི་སྤྱི་ཚོགས་ནང་སྨྲ་བརྗོད་རང་དབང་གི་ཚད་ལས་བརྒལ་ཏེ་རང་གཞུང་དབུས་བོད་མིའི་སྒྲིག་འཛུགས་དང་། བོད་མིའི་བླ་ན་མ་མཆིས་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བསམ་ཡུལ་ལས་འདས་པ་དང་བློ་ཡུལ་དུ་གཤོངས་དཀའ་བའི་གཞི་མེད་སྐྱོན་འཛུགས་དང་། ལྷག་པར་གཞན་གྱི་རྒྱུ་དངོས་དང་མགོ་སྐོར་བསླུ་ཁྲིད་འོག་ཏུ་སོང་བའི་གང་ཟག་རེ་ཟུང་གིས་༸རྒྱལ་བའི་སྐུ་ཕྱྭར་ཡང་ཐོ་བརྩམས་ཕོད་པའི་བསམ་ངན་སྦྱོར་རྩུབ་ཅན་དང་། དེའི་གཡས་གཡོན་དུ་ཡོད་པའི་རིགས་མཐུན་སྐུལ་འདེད་པ་དང་བསམ་ཕྱོགས་གཅིག་མཐུན་པ་དག་ལའང་ཁ་གཏད་གདོང་ལེན་བྱེད་སྒོ་གང་འོས་བྱ་རྒྱུ་ཡིན་ཞེས་ནན་བརྗོད་བྱ་རྒྱུ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ལ་བརྩི་བཀུར་ཞུ་མཁན་དང་། རང་གཞུང་བཙན་བྱོལ་བོད་མིའི་སྒྲིག་འཛུགས་ལ་དབུ་འོག་དཔུང་འདེགས་ཀྱིས་བོད་དོན་བདེན་པའི་འཐབ་རྩོད་གནང་འདོད་ཀྱི་རེ་འདུན་ཡོད་མཁན་གྱི་བོད་རིགས་རྣལ་མ་ཞིག་ཡིན་ན་མི་ངན་དེ་རིགས་ལ་ཆོས་དང་ཟང་ཟིང་གི་འབྲེལ་བ་མི་བྱེད་པ་དང་། མི་ངན་གྱི་རྒྱབ་ལངས་དང་བྱས་ངན་འགེབས་སྲུང་མ་བྱས་པར་སླད་ཕྱིན་ཡང་དེ་རིགས་ངན་པ་རྒྱ་ཡན་དུ་མི་འགྲོ་བར་དམ་དོན་ཡིད་གཟབ་འབད་བརྩོན་སྔར་ལྷག་གནང་རྒྱུར་འབོད་སྐུལ་དང་དྲན་སྐུལ་ཡང་ཞུ་བཞིན་ཡོད།

དེ་རིང་འདིར་བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་ལོ་ངོ་ ༥༤ ཧྲིལ་པོ་འཁོར་བའི་དུས་དྲན་དང་སྟབས་བསྟུན་གྱིས་ཨ་རིའི་སྲིད་གཞུང་ནས་བོད་དོན་ཁྲིམས་འཆར་གཏན་འབེབས་བྱུང་བ་སོགས་བོད་དོན་བདེན་པའི་འཐབ་རྩོད་ལ་རྒྱལ་སྤྱིའི་སྲིད་གཞུང་དང་གྲོས་ཚོགས་འཐུས་མི། དེ་བཞིན་གཞུང་དང་གཞུང་འབྲེལ་མ་ཡིན་པའི་ཚོགས་སྒེར་ཁག་ནས་ད་བར་དངོས་ཤུགས་རྒྱུད་གསུམ་ནས་རྒྱབ་སྐྱོར་ཤུགས་ཆེ་གནང་བར་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ཐུགས་རྗེ་ཆེ་ཞུ་རྒྱུ་དང་། ལྷག་པར་དུ་རྒྱལ་སྤྱིའི་གཞུང་དང་གཞུང་འབྲེལ་མ་ཡིན་པའི་ཚོགས་སྒེར་ཁག་དང་། རང་རིགས་མི་མང་དང་བཅས་པས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་དང་བོད་དོན་འཐབ་རྩོད་ཀྱི་ལས་འགུལ་ལ་ད་བར་དངོས་ཤུགས་རྒྱུད་གསུམ་དང་སྔ་ཕྱི་བར་གསུམ་དུ་རྒྱབ་སྐྱོར་དང་། མཐུན་འགྱུར་རོགས་རམ་གནང་མཁན་ཡོངས་ལ་དེ་རིང་གི་གོ་སྐབས་འདི་བརྒྱུད་ནས་ཐུགས་རྗེ་ཆེ་ཞེས་ཞུ་རྒྱུ་དང་སྦྲགས། སླད་མར་ཡང་ཇི་སྲིད་བོད་རང་བཙན་གྱི་བདེན་མཐའ་མ་བསལ་གྱི་བར་དེ་སྲིད་དུ་རྒྱབ་སྐྱོར་དང་མཐུན་འགྱུར་རོགས་རམ་སྔར་ལྷག་མུ་མཐུད་གནང་སྐྱོང་ཡོང་བའི་འབོད་སྐུལ་ཡང་ཞུ་རྒྱུ་ཡིན།

མཐའ་དོན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཅིང་ཐུགས་ཀྱི་བཞེས་དགོངས་མཐའ་དག་གེགས་མེད་ལྷུན་གྱིས་འགྲུབ་པ་དང་། བོད་རང་དབང་རང་བཙན་གྱི་རྒྱལ་ཁབ་དེ་བཞིན་མགྱོགས་ནས་མྱུར་དུ་སླར་གསོ་ཐུབ་ནས་གཞིས་བྱེས་བོད་མི་ཡོངས་རྫོགས་མཉམ་འཛོམས་ཡོང་བའི་བཀྲིས་སྨོན་འདུན་གྲངས་མེད་ཞུ་རྒྱུ་དང་བཅས། བོད་རྒྱལ་ལོ། །

བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་དབུས་རྒྱུན་ལས་ཁང་ནས།

བོད་རྒྱལ་ལོ་ ༢༡༥༡ ཕྱི་ལོ་ ༢༠༢༤ ཟླ་ ༡༠ ཚེས་ ༧ ཉིན།

Document 12

བདེ་སྐྱིད་གླིང་ནས་ལྡི་ལི་བར་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད།

ཟླ་བཅུ་པ། 2, 2024ཟླ་བཅུ་པ། 8, 2024 Tenzin Lobsang གལ་ཆེན་གནད་དོན་ཁག, གསར་འགྱུར།, ཉེ་བའི་གསར་འགྱུར།, བོད་ཀྱི་གསར་འགྱུར།, བོད་དོན་ཞུ་གཏུགས་ལས་འགུལ།, ལས་འགུལ།, ལོ་འཁོར་ལས་འགུལ། Leave a comment

བོད་ཀྱི་གཞོན་ནུ་ལྷན་ཚོགས་ནས་དགྲ་བོ་རྒྱ་དམར་སྲིད་གཞུང་གིས་ད་ལྟའི་ཆར་བོད་ནང་རིག་གཞུང་རྩ་མེད་བཟོ་བཞིན་པའི་ཛ་དྲག་གི་གནས་སྟངས་ལ་ངོ་རྒོལ་སྐྱོན་བརྗོད་དང་། དགྲ་བོ་རྒྱ་དམར་སྲིད་གཞུང་འགོ་བཙུགས་ཏེ་ལོ་ངོ་ཧྲིལ་པོ་ ༧༥ འཁོར་བའི་དུས་ཆེན་སྲུང་བརྩི་ལ་ངོ་རྒོལ་དང་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་དེ་བཞིན་ཕྱི་ལོ་ ༢༠༢༥ ཟླ་ ༩ ཚེས་ ༢༤ ཉིན་དངོས་སུ་བདེ་སྐྱིད་གླིང་བོད་སྒར་ནས་འགོ་འཛུགས་ཞུས་ཡོད། དེ་ཡང་་དབུ་འབྱེད་ཀྱི་མཛད་སྒོར་རྒྱ་གར་བོད་དོན་རྒྱབ་སྐྱོར་བ་ཨིན་དེར་པཱལ་སིངྒ་ཁོ་ལི་མཆོག (Inderpal Singh Kholi) ཨ་ཇཱཡ་ཀོ་ཐི་ཡཱལ། (Ajay Kothiyal) རཱ་ཇེཤ་ཀུ་མཱར་གཽ་ཏམ (Rajesh Kumar Gautam) མཆོག སྐུ་ཞབས་བྷར་ཏི་མཆོག (Dr CL Bharti), ( Shri Naveen Ji) གཙོས་ས་གནས་ཀྱི་འབྲེལ་ཡོད་རྣམས་གདན་ཞུས་ཐོག་གསར་འགོད་བསྒྲགས་གཏམ་སོགས་སྤེལ་ཏེ་ཉིན་དང་པོའི་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་དེ་བཞིན་བདེ་སྐྱིད་གླིང་ནས་སྤོན་ཊ་བོད་མིའི་གཞིས་ཆགས་བར་བྱས་ཡོད་པ་དང་། ཉིན་ཕྱེད་ཙམ་ལ་ལ་ཁན་ཝ་ལ་བོད་མིའི་གཞིས་སྒར་དུ་བདེ་འབྱོར་བྱུང་བ་དང་དེ་ག་ས་གནས་གཞོན་ལྷན་དང་བུད་མེད་སོགས་ཀྱིས་ཕེབས་བསུའི་སྣེ་ལེན་སོགས་གནང་ཡོད། རྐང་འཁོར་སྐོར་སྐྱོད་ཀྱི་ལམ་བར་ནས་ཡིག་ཆ་འགྲེམས་སྤེལ་དང་གསར་འགོད་པའི་དྲིལ་བར་ལན་འདེབས་སོགས་ཀྱི་དྲིལ་བསྒྲགས་གང་ལེགས་ཞུས་མཚམས་མཐར་རྒྱང་ཚད་ (KM) ༦༠ ཙམ་རྐང་འཁོར་སྐོར་སྐྱོད་བྱས་མཚམས་སྤོན་ཊ་ས་གནས་སུ་བདེ་འབྱོར་བྱུང་བ་དང་སྐབས་དེར་ས་གནས་གཞིས་འགོ་སྐུ་ངོ་དགེ་ལེགས་འཇམ་དབྱངས་མཆོག་དང་། ས་གནས་གཞོན་ལྷན་གཙོས་ཚོགས་སྡེ་ཁག་དང་མང་ཚོགས་ནས་ཕེབས་བསུའི་སྣེ་ལེན་གང་ལེགས་ཞུས་གནང་ཡོད།

ཕྱི་ཉིན་ཕྱི་ལོ་ ༢༠༢༤ ཟླ་ ༩ ཚེས་ ༢༥ བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་ཞུས་པའི་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ཉིན་གཉིས་པར། བོད་སྒར་སྤོན་ཊ་ཆོལ་གསུམ་གཞིས་ཆགས་ནས་ཞོགས་པ་ཕྱག་ཚོད་ ༨།༡༥ ཐོག་རང་གཞུང་དབུས་བོད་མིའི་སྒྲིག་འཛུགས་ཀྱི་དཔལ་ལྡན་སྐུ་ངོ་སྲིད་སྐྱོང་སྤེན་པ་ཚེ་རིང་མཆོག་དང་བོད་དོན་རྒྱབ་སྐྱོར་བ་ཨ་ནིན་དྷར་སེང་མཆོག་རྣམ་གཉིས་ནས་རྐང་འཁོར་སྐོར་སྐྱོད་དབུ་འབྱེད་འགོ་འཛུགས་ཀྱིས་ཉིན་གང་བོར་རྐང་འཁོར་སྐོར་སྐྱོད་དང་ཡིག་ཆ་འགྲེམས་སྤེལ། གཞན་ཡང་གསར་འགོད་པ་ཁག་ཅིག་གི་དྲི་བར་ལན་འདེབས་སོགས་བྱས་ཏེ་ཉི་མའི་ཚ་གདུག་དང་ཀྱག་ཀྱོག་གི་གཞུང་ལམ། ཆར་ཤུགས་སོགས་ལ་མ་འཛེམས་པར་མདུན་སྐྱོད་མུ་མཐུད་བྱས་ཏེ་མཐར་ན་རེན་གྷར་ཞེས་པའི་ས་ཚིགས་སུ་བདེ་འབྱོར་བྱུང་ཡོད་པ་དང་དེར་ཞག་སྡོད་བྱས་ཡོད།
རྐང་འཁོར་སྐོར་སྐྱོད་ཀྱི་ཉིན་གསུམ་པར་ན་རན་གྷར་ཞེས་པའི་ས་ཚིགས་ནས་སྔ་དྲོ་ཆུ་ཚོད་ ༨།༣༠ ཐོག་ཕྱོགས་ཐོན་གྱིས་པན་ཅི་ཀུ་ལ་ཞེས་པའི་ས་ཚིགས་སུ་ཉིན་གུང་ཞལ་ལག་གོ་སྒྲིག་དང་། ས་ཚིགས་དེར་ཅན་དྷི་གྷར་ས་གནས་ཚོགས་གཙོ་ཆེད་བཅར་གྱིས་དང་བླངས་བ་རྣམས་ལ་ཕེབས་བསུ་དང་གསར་འགོད་པ་ཡང་མཉམ་ཁྲིད་ཀྱིས་གསར་འགོད་དྲིལ་བསྒྲགས་གང་ལེགས་བྱུང་ཡོད་པ་མ་ཟད། ཕྱི་དྲོ་ཆུ་ཚོད་ ༦།༠༠ པ་ཙམ་ལ་ཅན་དྷི་གྷར་དུ་བདེ་འབྱོར་བྱུང་བ་མ་ཟད། ས་གནས་གཞོན་ལྷན་གྱི་དང་བླངས་བ་སློབ་ཕྲུག་རྣམས་ནས་སྣེ་ལེན་གཟབ་རྒྱས་ཞུས་ཡོད། ཉིན་དེའི་རྐང་འཁོར་སྐོར་སྐྱོད་ཀྱི་ལམ་བར་དུ་ཆར་པ་ཤུགས་ཆེ་བབས་ཀྱང་ལས་འགུལ་བ་རྣམས་ནས་སེམས་ཤུགས་ཆེན་པོས་མུ་མཐུད་མདུན་སྐྱོད་ཀྱིས་རྐང་འཁོར་སྐོར་སྐྱོད་གནང་བར་བརྟེན། དམིགས་འདུན་བཞིན་ཉིན་དེའི་ས་ཚིགས་ཅན་དྷི་གྷར་དུ་དུས་ཐོག་ཏུ་བདེ་འབྱོར་ཐུབ་པ་བྱུང་ཡོད།
བོད་དོན་དྲིལ་བསྒྲགས་རྐང་འཁོར་སྐོར་སྐྱོད་ཀྱི་ཉིན་བཞི་པ་ཕྱི་ལོ་ ༢༠༢༤ ཟླ་ ༩ ཚེས་ ༢༧ ཉིན་ནི་ཕྱི་ལོ་ ༡༩༨༧ ཟླ་ ༩ ཚེས་ ༢༧ ཉིན་བོད་ཀྱི་རྒྱལ་ས་ལྷ་སར་མི་རབས་གསར་པས་སྣེ་འཁྲིད་བྱས་ཏེ་དགྲ་བོ་རྒྱ་དམར་སྲིད་གཞུང་ལ་ཞི་བའི་ངོ་རྒོལ་གྱི་རྔམ་སྟོན་ཁྲོམ་སྐོར་གནང་ནས་ལོ་ངོ་ ༣༧ འཁོར་བའི་དུས་དྲན་དང་སྟབས་བསྟུན་གྱིས་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱན་ལས་ཁང་ནས་གོ་སྒྲིག་དང་ཅན་གྷར་ས་གནས་གཞོན་ལྷན་གྱི་མཐུན་འགྱུར་འོག་ཅན་དྷི་གྷར་གསར་འགོད་ལྷན་ཚོགས་ཀྱི་ཚོགས་ཁང་དུ་གསར་འགོད་ལྷན་ཚོགས་ཤིག་གོ་སྒྲིག་ཞུས་ཡོད་པ་དང་སྐབས་དེར་། རྒྱ་གར་གནད་ཡོད་ར་ཇཱ་མོ་ཧ་ལི་མཆོག་དང་འཕགས་བོད་འབྲེལ་མཐུད་ཚོགས་པའི་དབུས་རྒྱུན་སར་བྷཌ་ཇི་མཆོག ཀི་ནོར་སློབ་ཕྲུག་ལྷན་ཚོགས་ཀྱི་ཚོགས་གཙོ་མོ་ཧིཊ་མཆོག ཝི་ཤལ་བྷ་ལི་དང་སིམ་རན་མཆོག་བཅས་དང་ལྷན་རྒྱ་གར་གཞུང་འཛིན་ཚོགས་པའི་ཅན་གྷར་གཞོན་སྐྱེས་རུ་ཁག་གི་ཚོགས་གཞོན་སྐུ་ཞབས་པི་ཡུ་ཤི་གྷུབ་ཏ་མཆོག་བཅས་ཆེད་ཕེབས་དང་རྐང་འཁོར་སྐོར་སྐྱོད་དབུ་འབྱེད་གནང་རྗེས། དྭང་བླངས་ལས་འགུལ་བ་རྣམས་ནས་ཅན་གྷར་རྒྱལ་སར་དྲིལ་བསྒྲགས་ཀྱི་སྐོར་སྐྱོད་གྲུབ་མཚམས་ཨམ་བྷ་ལ་བར་རྐང་འཁོར་སྐོར་སྐྱོད་གནང་ཡོད། ཉིན་དེར་ཨམ་བྷ་ལར་འབྱོར་མཚམས་ཨམ་བྷ་ལར་གནས་བཞུགས་བོད་རིགས་ཚོང་པ་སྡེ་ཁག་ནས་སྣེ་ལེན་ཞུས་གནང་ཏེ་ཉིན་བཞི་པའི་རྐང་འཁོར་སྐོར་སྐྱོད་ཀྱི་ལས་རིམ་གང་ལེགས་དང་། ཕྱི་ཉིན་ཨམ་བྷ་ལར་གནས་བཞུགས་བོད་རིགས་དགུན་ཚོང་སྡེ་ཚན་གྱི་འཐུས་མི་གཙོས་ཚོགས་མི་རྣམས་ནས་གསོལ་ཇ་གདེགས་འབུལ་གྱི་ཕེབས་བསུའི་སྣེ་ལེན་དང་། གཞན་ཡང་ས་གནས་ཀྱི་འཕགས་བོད་འབྲེལ་མཐུད་ཚོགས་པའི་རྒྱུན་ལས་དང་བོད་དོན་རྒྱབ་སྐྱོར་བ་ཁག་ཅིག་ནས་རྐང་འཁོར་སྐོར་སྐྱོད་དབུ་འབྱེད་གྲུབ་མཚམས་དང་བླངས་ལས་འགུལ་བ་རྣམས་གཞུང་ལམ་དང་ཁྲོམ་གཞུང་སོགས་ནས་སྐོར་སྐྱོད་ཀྱིས་ཡིག་ཆ་འགྲེམས་སྤེལ་སོགས་ཀྱི་དྲིལ་བསྒྲགས་ཤུགས་ཆེར་བྱུང་སྟེ་ཉིན་དེའི་ས་ཚིགས་ཀུ་རུ་ཤེ་ཊར་དུ་དུས་ཐོག་ཏུ་འབྱོར་ཐུབ་པ་བྱུང་། དེ་ཉིན་དམིགས་བསལ་ལམ་བར་ནས་རྐང་འཁོར་གཉིས་ཙམ་རྡབ་སྐྱོན་བྱུང་ཡང་རྨས་སྐྱོན་ཚབ་ཆེ་མེད་པར་ས་ཚིགས་སུ་བདེ་འབྱོར་བྱུང་ཐུབ་པ་བྱུང་ཡོད། ཕྱི་ཉིན་ཏེ་ཕྱི་ལོ་ ༢༠༢༤ ཟླ་ ༩ ཚེས་ ༢༩ ཉིན་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་ཞུས་པའི་བོད་དོན་དྲིལ་བསྒྲགས་རྐང་འཁོར་སྐོར་སྐྱོད་ཀྱི་ཉིན་དྲུག་པར། སྔ་དྲོ་ཀུ་རུ་ཤེ་ཏར་ནས་འགོ་འཛུགས་ཀྱིས་ཁྱོན་སྤྱི་ལེ་ ༨༠ ཙམ་སྐོར་སྐྱོད་བྱས་མཚམས། ཉིན་དེའི་ས་ཚིགས་པ་ནི་པཊ་རུ་བདེ་འབྱོར་བྱུང་བ་མ་ཟད། དེ་གའི་ས་གནས་སུ་འབྱོར་མཚམས་ས་གནས་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི་ (BTSM Member) དང་གཞན་བོད་དོན་རྒྱབ་སྐྱོར་བ་ཁག་ཅིག་ནས་ཕེབས་བསུའི་སྣེ་ལེན་དང་སྦྲགས། གསར་འགོད་པའི་དྲི་བར་ལན་འདེབས་སོགས་ཀྱི་དྲིལ་བསྒྲགས་གང་ལེགས་བྱུང་བ་དང་དེ་ཉིན་རྒྱ་གར་གྱི་འགྲུལ་པའི་སྣེ་ལེན་ཁང་འམ་དྷ་རམ་ཤ་ལ་ཞིག་ནང་མཚན་སྡོད་ཀྱིས་ཕྱི་ཉིན་ཕྱི་ལོ་ ༢༠༢༤ ཟླ་ ༩ ཚེས་ ༣༠ ཉིན་རྐང་འཁོར་སྐོར་སྐྱོད་ཀྱི་ཉིན་ ༧ པར་བོད་ཀྱི་གཞོན་ནུ་ལྷན་ཚོགས་ཀྱི་རྐང་འཁོར་སྐོར་སྐྱོད་པ་རྣམས་ཞོགས་པ་པ་ནི་པཊ་ནས་ཕྱོགས་ཐོན་གྱིས་ཉིན་རྒྱབ་ལྡི་ལི་བོད་ཁྱིམ་སྡོད་ཁང་དུ་བདེ་འབྱོར་བྱུང་བ་དང་། སྐབས་དེར་རོ་ཧི་ནི་ས་གནས་གཞོན་ལྷན་གྱི་ཚོགས་མི་དང་བོད་ཁྱིམ་སྡོད་ཁང་ནས་ཕེབས་བསུའི་སྣེ་ལེན་གང་ལེགས་ཞུས་ཡོད་པ་མ་ཟད། དེའི་རྗེས་ལས་འགུལ་བ་རྣམས་ལྡི་ལི་བསམ་ཡས་གླིང་དུ་ཕྱོགས་ཐོན་གྱིས་ཕྱི་དྲོའི་ཆུ་ཚོད་ ༦།༣༠ ཙམ་ལ་བདེ་འབྱོར་བྱུང་མཚམས་ལྡི་ལི་བསམ་ཡས་གླིང་ས་གནས་གཞོན་ལྷན་དང་གཞན་ཡང་བོད་སྒར་བསམ་ཡས་གླིང་གི་ཚོགས་སྡེ་ཁག་ནས་ཕེབས་བསུའི་མཇལ་དར་སོགས་སྒྲོན་ཏེ་སྣེ་ལེན་གཟབ་རྒྱས་ཞུས་ཡོད་པ་མ་ཟད། ལས་འགུལ་མཇུག་སྡོམས་ཀྱི་མཛད་སྒོ་གོ་སྒྲིག་ཞུས་ཏེ་སྐབས་དེར་དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཟུར་པ་སྐུ་ངོ་ཨཱ་ཅཱརྱ་ཡེ་ཤེས་ཕུན་ཚོགས་མཆོག་དང་མངའ་སྡེའི་གྲོས་ཚོགས་འཐུས་མི་སྐུ་ཞབས་མ་དྷན་ལལ་མཆོག འཕགས་བོད་མཛའ་འབྲེལ་ཚོགས་པའི་སྤྱི་ཁྱབ་དྲུང་ཆེ་པན་ཀཱཇ་གྷོ་ཡལ་མཆོག་དང་ཕྱག་རོགས་གཞན། གཞན་ཡང་ས་གནས་གཞིས་འགོ་ལས་ཁུངས་ཀྱི་སྐུ་ཚབ་དང་བརྒྱ་དཔོན་གཙོས་ས་གནས་ཀྱི་ཚོགས་སྡེ་ཁག་གི་སྐུ་ཚབ་སོགས་དབུ་བཞུགས་ཐོག་ལས་འགུལ་ངོ་སྤྲོད་དང་གཏམ་བཤད་སོགས་སྤེལ་ཏེ་ལས་འགུལ་མཇུག་སྒྲིལ་གྱིས་བོད་ཀྱི་གཞོན་ནུ་ལྷན་ཚོགས་ཀྱི་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་དེ་བཞིན་ལམ་ལྷོངས་ལེགས་གྲུབ་ངང་རྒྱ་གར་གྱི་མངའ་སྡེ་བཞི་དང་གྲོང་ཁྱེར་གཉིས་ཙམ་ནང་དྲིལ་བསྒྲགས་སྐོར་སྐྱོད་དང་། གསར་འགྱུར་བརྒྱུད་ལམ་ཁག་ ༧༠ ལྷག་ནང་བོད་དོན་དྲིལ་བསྒྲགས་ཤུགས་ཆེར་བྱུང་ཐུབ་ཡོད།

རྐང་འཁོར་སྐོར་སྐྱོད་ཀྱི་དམིགས་ཡུལ་དང་དགོས་འདུན།

༡༽ དགྲ་བོ་རྒྱ་དམར་སྲིད་གཞུང་ནས་བོད་ནང་རིག་གཞུང་རྩ་མེད་གཏོང་མཚམས་མྱུར་དུ་འཇོག་དགོས།
༢༽ དགྲ་བོ་རྒྱ་དམར་སྲིད་གཞུང་ནས་བོད་ནང་མི་སྤྱོད་ལས་འདས་པའི་བྱ་ངན་སྣ་ཚོགས་སྤེལ་མུས་ཡིན་པར་རྒྱལ་སྤྱིའི་སྤྱི་ཚོགས་ནས་དུས་མཚམས་ཀྱི་གནོན་ཤུགས་དང་བོད་དོན་ལ་རྒྱབ་སྐྱོར་སྔར་ལྷག་གནང་སྐྱོང་ཡོང་བའི་འབོད་སྐུལ་ཞུ་རྒྱུ།
༣༽ རྒྱ་གར་གཞུང་དམངས་གཉིས་ནས་རྒྱ་གར་གྱི་བདེ་འཇགས་དང་ཞི་བདེ་སོགས་ལ་དམིགས་ཏེ་བོད་རང་བཙན་གྱི་བདེན་པའི་གནས་བབ་ལ་རྒྱབ་སྐྱོར་ཡོང་བའི་འབོད་སྐུལ།

བོད་དོན་འཐབ་རྩོད་ཐོག་ནུས་པ་མཉམ་སྤུང་ཐད་གོ་བསྡུར་སྦྱང་བཤད།

ཟླ་དགུ་པ། 28, 2024ཟླ་བཅུ་པ། 8, 2024 Tenzin Lobsang གསར་འགྱུར།, ཉེ་བའི་གསར་འགྱུར།, བོད་ཀྱི་གསར་འགྱུར།, བོད་དོན་ཞུ་གཏུགས་ལས་འགུལ།, བོད་མེར་སྲེག་གཏོང་བ།, ལོ་འཁོར་ལས་འགུལ། Leave a comment

དེ་རིང་ཕྱི་ལོ་ ༢༠༢༤ ཟླ་ ༩ ཚེས་ ༡༧ ཉིན་རྒྱབ་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་མཆོག་དང་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་གི་སྐུ་ཚབ་རྣམས་ནས་བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་འགན་འཛིན་སྐུ་ཞབས་སུན་ཡོའུ་ལཱན་ (Mr. SUN You-lian) མཆོག་དང་། སྤྱི་ཁྱབ་དྲུང་ཆེ་སྐུ་ཞབས་བཀྲ་ཤིས་ཚེ་རིང་མཆོག བོད་དོན་རྒྱབ་སྐྱོར་བ་ལྕམ་ལིའོ་ཧུའེ་ཕང་ (Ms. LIAO Hui-Fang) མཆོག་བཅས་དང་ལྷན་བོད་དོན་འཐབ་རྩོད་ཐོག་ནུས་པ་མཉམ་སྤུང་ཐད་གོ་བསྡུར་སྦྱང་བཤད་གང་ལེགས་བྱུང་ཡོད།

རྒྱ་གར་གྱི་འབྲེལ་ཡོད་དཔོན་རིགས་དང་བོད་དོན་རྒྱབ་སྐྱོར་བ་དང་མཇལ་འཕྲད།

ཟླ་དགུ་པ། 23, 2024ཟླ་བཅུ་པ། 8, 2024 Tenzin Lobsang གལ་ཆེན་གནད་དོན་ཁག, གསར་འགྱུར།, གསར་འགོད་གསལ་བསྒྲགས།, ཉེ་བའི་གསར་འགྱུར།, བོད་ཀྱི་གསར་འགྱུར།, བོད་དོན་ཞུ་གཏུགས་ལས་འགུལ།, ལས་འགུལ།, ལོ་འཁོར་ལས་འགུལ། Leave a comment

བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་མཆོག་དང་བདེ་སྐྱིད་གླིང་ས་གནས་གཞོན་ལྷན་གྱི་དྲུང་ཆེ་པ་སངས་ལགས། གཞོན་ལྷན་དྲྭ་རྒྱ་དོ་དམ་པ་བསྟན་འཛིན་བློ་བཟང་ལགས་བཅས་ནས་རྒྱ་གར་གྱི་འབྲེལ་ཡོད་དཔོན་རིགས་དང་བོད་དོན་རྒྱབ་སྐྱོར་བ་སྐུ་ཞབས་ཨ་ཇེ་ཀོ་ཐི་ཡལ་མཆོག བོད་དོན་རྒྱབ་སྐྱོར་བ་སྐུ་ཞབས་ཨིན་དྷིར་པལ་སེང་མཆོག་དང་སྐུ་ཞབས་ན་ཝིན་པར་ཤལ་སོགས་དང་མཇལ་འཕྲད་ཀྱིས་རྐང་འཁོར་སྐོར་སྐྱོད་ཀྱི་དགོས་དམིགས་དང་བོད་ནང་གི་ཛ་དྲག་གནས་སྟངས་སོགས་ཀྱི་ཐད་གོ་བསྡུར་ལྷུག་པོ་བྱུང་བ་མ་ཟད། སང་ཉིན་རྐང་འཁོར་སྐོར་སྐྱོད་ཀྱི་དབུ་འབྱེད་མཛད་སྒོའི་སྐུ་མགྲོན་དུ་ཆེད་ཕེབས་གནང་རྒྱུའི་ཞལ་བཞེས་ཡང་ཐོབ་ཡོད།