དགུན་དུས་ཨོ་རྩལ་འགྲན་ཚོགས་ལ་ངོ་རྒོལ།

ཕྱི་ལོ་ ༢༠༢༢ ཟླ་ ༡ ཚེས་ ༤ ཉིན་ནིའུ་ཡོག་ནིའུ་ཇ་སིའི་ས་གནས་གཞོན་ནུའི་གོ་སྒྲིག་འོག་ཨ་རིའི་རྒྱལ་ས་ནིའུ་ཡོག་ཏུ་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་བ་དེར་གཞོན་ལྷན་དབུས་ཀྱི་སྤྱི་ཁྱབ་ཚོགས་གཙོ་དང་། ཟུང་དྲུང་། རིག་གཞུང་འགན་འཛིན་བཅས་མཉམ་ཞུགས་གནང་ཡོད། སྐབས་དེར་སྤྱི་ཁྱབ་ཚོགས་གཙོ་ནས་མི་མང་ལ་ལས་འགུལ་དང་འབྲེལ་བའི་གཏམ་བཤད་གནང་གྲུབ་རྗེས་རྒྱ་ནག་གཞུང་ཚབ་ནས་ཨན་བྷི་སིའི་(NBC)གསར་ཁང་གི་ལས་ཁུངས་བར་ཞི་བའི་གོམ་བགྲོད་ཀྱི་ངོ་རྒོལ་སྐད་འབོད་ལས་འགུལ་སྤེལ་ཡོད།

ཁམས་བྲག་འགོའི་ཛ་དྲག་གནས་སྟགས་ལ་གདུང་སེམས་མཉམ་སྐྱེད་ཀྱི་ལས་འགུལ།

ཕྱི་ལོ་ ༢༠༢༡ ཟླ་ ༡༢ ཚེས་ ༢༨ ཉིན་བོད་ཀྱི་གཞོན་ནུ་ལྷན་ཚོགས་དང་། རྒྱ་གར་སྡེ་ཚན་གྱི་བོད་རང་བཙན་སློབ་ཕྲུག་ཚོགས་པ་གཉིས་ཟུང་སྦྲེལ་གྱིས་བོད་ཁམས་བྲག་འགོའི་ནང་རྒྱ་ནག་དམར་ཤོག་སྲིད་གཞུང་ནས་སྡུག་རྩུབ་ཅན་གྱི་སྲིད་ཇུས་ལག་བསྟར་གྱིས་ཕྱི་ཟླ་ ༡༢ པའི་ཟླ་མཇུག་ཏུ་བྲག་མགོའི་དགའ་ལྡན་རབ་བརྟན་རྣམ་རྒྱལ་གླིང་ངམ་། བྲག་འགོ་དགོན་ཆེན་གྱི་སློབ་གྲྭ་རྩ་གཏོར་བཏང་བ་དང་། དེའི་རྗེས་སུ་མཐོ་ཚད་ཕུ་ཁྲུ་ ༩༩ ཡོད་པའི་སངས་རྒྱས་ཀྱི་སྐུ་འདྲ་འམ་སྐུ་བརྙན་གཙོས་པའི་མ་ཎི་འཁོར་ལོ་ ༤༥ ཙམ་རྩ་གཏོར་བཏང་བ་སོགས་ཀྱི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱིས་མེག་གྷན་ཁྲོམ་གཞུང་དུ་མར་མེ་ཁྲོམ་སྐོར་ཞིག་གོ་སྒྲིག་ཞུས་ཡོད། སྐབས་དེར་གཞོན་ལྷན་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་ནས་ལས་རིམ་གཙོ་སྐྱོང་གིས་བོད་སྐད་གཏམ་བཤད་སྤེལ་བ་དང་། བོད་རང་བཙན་སློབ་ཕྲུག་ཚོགས་པའི་ལས་འཆར་འགན་འཛིན་བསྟན་འཛིན་པ་སངས་ལགས་ནས་དབྱིན་ཡིག་བསྒྲགས་གཏམ་སྒྲོག་སྦྱང་གནང་ཡོད། སྐབས་དེར་ཁམས་བྲག་འགོའི་ཛ་དྲག་གནས་སྟངས་ལ་རྒྱུས་མངའ་ཡོད་པའི་བྲག་འགོ་དཔལ་ལྡན་ལགས་ནས་སྤྱི་ཡོངས་ཀྱི་བྲག་འགོའི་ཛ་དྲག་གནས་སྟངས་ཐད་གཏམ་བཤད་ཡང་སྤེལ་བ་མ་ཟད། བཀུར་འོས་བོད་མི་མང་སྤྱི་འཐུས་དགེ་བཤེས་གོ་བོ་བློ་བཟང་ཕན་བདེ་ལགས་དང་། ལྷ་རྒྱ་རི་རྣམ་རྒྱལ་སྒྲོལ་སྐར་ལགས་རྣམ་གཉིས་གདན་ཞུས་ཀྱིས་གཏམ་བཤད་ཀྱང་སྤེལ་ཏེ་ལས་འགུལ་ལེགས་གྲུབ་བྱུང་ཡོད།

ལྡི་ལི་བསམ་ཡས་གླིང་ས་གནས་གཞོན་ལྷན་གྱི་སྦག་སྦག་སྐོར་སྐྱོད་དབུ་འཛུགས།

བོད་རྒྱལ་ལོ་ ༢༡༤༨ ཕྱི་ལོ་ ༢༠༢༡ ཟླ་ ༡༢ ཚེས་ ༡༠ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོར་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ཉིན་དང་། རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་དང་སྟབས་བསྟུན་གྱིས་བོད་ཀྱི་གཞོན་ནུ་ལྷན་ཚོགས་ཀྱི་ས་གནས་གཞོན་ལྷན་བསམ་ཡས་གླིང་གི་གོ་སྒྲིག་འོག རྒྱ་གར་ལྷོ་ཕྱོགས་བྷེང་ལོར་ནས་འགོ་འཛུགས་ཀྱིས་རྒྱ་གར་རྒྱལ་ཡོངས་སུ་སྦག་སྦག་སྐོར་སྐྱོད་ཅིག་གོ་སྒྲིག་ཞུས་ཏེ་རྒྱ་ནག་ནང་འཚོག་རྒྱུའི་དགུན་དུས་ཨོ་རྩལ་འགྲན་ཚོགས་ཚུགས་རྒྱུའི་འོས་བབས་མེད་པའི་ངོ་རྒོལ་སྐྱོན་བརྗོད་ཀྱི་གཞི་རྒྱ་ཆེ་བའི་ལས་འགུལ་ཞིག་སྤེལ་ཡོད་པ་དང་། སྐབས་དེར་སྦག་སྦག་སྐོར་སྐྱོད་ཀྱི་དབུ་འབྱེད་མཛད་སྒོར་གཞོན་ལྷན་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་ཆེད་བཅར་གྱིས་གཏམ་བཤད་སྤེལ་དོན་དུ། བོད་ཀྱི་གཞོན་ནུ་ལྷན་ཚོགས་ནས་ལོ་ངོ་ ༥༡ ཧྲིལ་པའི་རིང་ཆོལ་ཁ་དང་། ཆོས་ལུགས། ཕོ་མོ་དང་རིགས་རུས་དབྱེད་མེད་ཀྱིས་བོད་ཀྱི་ཆབ་སྲིད་འཐབ་རྩོད་ནང་ཞབས་ཞུ་སྒྲུབ་ཡོད་པ་དང་། གྲུབ་འབྲས་ལྡན་པའི་ལས་འགུལ་སྣ་མང་སྤེལ་བར་བརྟེན་གཞོན་ལྷན་གྱི་སྒྲིག་འཛུགས་འདིར་བོད་ཕྱི་ནང་གཉིས་ཀྱི་བོད་མི་ཚོས་རེ་བ་དང་། ཡིད་ཆེས་བརྟན་པོ་ཡོད་བསྡད་པ་ཞིག་དང་། རྒྱ་ནག་དམར་ཤོག་སྲིད་གཞུང་ནས་ཀྱང་དུས་ནམ་ཡིན་ལ་སྡང་ཟུག་ཆེན་པོས་སྒྲིག་འཛུགས་ཀྱི་ལས་དོན་ལ་ཐབས་བརྒྱ་བྱུས་སྟོང་གིས་དོ་ཕོག་གཏོང་རྒྱུར་ཐབས་ཤེས་བྱེད་ཀྱིས་ཡོད་ཚུལ། དམིགས་བསལ་ཛ་དྲག་གི་དུས་སྐབས་འདིར་བོད་མི་སྤྱི་སྒེར་ཚང་མས་ཕྱར་གྲུ་མཉམ་འདེགས་ཀྱིས་ལས་འགུལ་གང་མང་དང་སྣ་མང་སྤེལ་དགོས་རྒྱུ་གལ་ཆེན་པོ་ཡིན་ཚུལ་སོགས་ཀྱི་ཐད་གཏམ་བཤད་སྤེལ་གནང་ཡོད། མཛད་སྒོ་གྲུབ་རྗེས་སྤྱི་ཁྱབ་དྲུང་ཆེ་མཆོག་ནས་སྦག་སྦག་སྐོར་སྐྱོད་པ་རྣམས་བྷེང་ལོར་ནས་༸གོང་ས་ཏཱ་ལའི་བླ་མའི་མཐོང་སློབ་བར་ཕེབས་སྐྱེལ་ཞུས་ཏེ་ཉིན་དེའི་ལས་འགུལ་ལེགས་གྲུབ་བྱུང་ཡོད།

ཉིན་དེར་བྱང་ཨ་རིའི་མི་ནི་སོ་ཊ་ས་གནས་གཞོན་ལྷན་ནས་ཀྱང་རྒྱ་ནག་གི་རྒྱལ་ས་པེ་ཅིང་ལ་ཚོགས་རྒྱུའི་དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་སྐྱོན་བརྗོད་དང། NBC གསར་ཁང་ནས་ཀྱང་རྒྱ་ནག་ཏུ་ཚོགས་ལ་ཉེ་བའི་དགུན་དུས་ཨོ་རྩལ་འགྲན་ཚོགས་དང་འབྲེལ་བའི་དྲིལ་བསྒྲགས་མཚམས་འཇོག་དགོས་ཚུལ་གྱི་དགོས་འདུན་སོགས་བཏོན་ཏེ་རྒྱ་ནག་གཞུང་ཚབ་མདུན་ཐང་དུ་ངོ་རྒོལ་སྐད་འབོད་ཀྱི་ལས་འགུལ་ཞིག་སྤེལ་ཡོད་པ་དང་། སྐབས་དེར་གཞོན་ལྷན་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་དང་། སྒྲིག་འགན་སྤེན་པ་ཚེ་རིང་ལགས་གཉིས་ནས་ཀྱང་མཉམ་ཞུགས་གནང་ཡོད།

རྒྱལ་གཅེས་དཔའ་བོ་དཔའ་མོ་རྗེས་དྲན་གྱི་ལས་འགུལ་དབུ་འབྱེད།

ཕྱི་ཚེས་ ༡༢ ཉིན་འགན་ལྷན་མཇུག་བསྡོམས་མཛད་སྒོ་དེ་བཞིན་ཨིམ་བྷི་རལ་གསོལ་མགྲོན་ཁང་རང་དུ་སྐུ་མགྲོན་གཙོ་བོ་རྒྱ་གར་གྱི་(RSS)ཚོགས་པའི་རྒྱུན་ལས་སྐུ་ཞབས་ཨིན་དྷིར་ཤི་ཀུ་མར་མཆོག་དང་། དམིགས་བསལ་སྐུ་མགྲོན་ཧིན་བོད་མཛའ་འབྲེལ་ཚོགས་པའི་དྲུང་ཆེ་སྐུ་ཞབས་པང་ཀ་ཇི་གྷོ་ཡལ་མཆོག་རྣམ་གཉིས་གདན་ཞུས་བཞིན་ཆེད་ཕེབས་ཀྱིས་བོད་དོན་དང་འབྲེལ་བའི་གལ་ཆེའི་གསུང་བཤད་གནང་ཡོད་པ་དང་། ལྷག་པར་དུ་བོད་ཀྱི་གཞོན་ནུ་ལྷན་ཚོགས་དང་། འཕགས་བོད་འབྲེལ་འཐུད་ཚོགས་པ་ (Bharat Tibet Sahyog Manch) ཞེས་པ། དེ་བཞིན་ལྡི་ལིར་རྟེན་གཞི་བྱས་པའི་ངག་མེད་མགྲིན་ཚབ་ཚོགས་པ་ (Voice for the Voiceless) བཅས་གསུམ་མཉམ་འབྲེལ་ཐོག་ད་བར་བོད་ཕྱི་ནང་གཉིས་ནས་བོད་རྒྱལ་ཁབ་དང་མི་རིགས་ཀྱི་ཆེད་དུ་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་ཀྱི་བཀའ་དྲིན་རྗེས་དྲན་ཞུ་སླད་ཁོང་རྣམ་པ་འདས་གྲོངས་སུ་ཕྱིན་པའི་ཟླ་ཚེས་གཞིར་བཟུང་གིས་རྒྱ་གར་གཙོས་ཕྱི་རྒྱལ་ཡུལ་གྲུའི་ས་གནས་མི་འདྲ་བ་གྲངས་ ༡༢༧ ཙམ་ནང་ཁོང་རྣམ་པའི་ལོ་རྒྱུས་དང་། བོད་ནང་གི་ཛ་དྲག་གནས་སྟངས་སྐོར་འགྲེལ་བརྗོད་གནང་རྒྱུའི་ལས་འགུལ་དངོས་སུ་འགོ་འཛུགས་ཀྱི་གསལ་བསྒྲགས་དང་བཅས་འཕགས་བོད་འབྲེལ་མཐུད་ཚོགས་པའི་ས་གནས་ཁག་ ༤༠ ཙམ་ནས་སྐུ་ཚབ་ཕེབས་ཐུབ་པ་བྱུང་ཡོད།