![](https://www.tibetanyouthcongress.org/wp-content/uploads/2023/07/48-1-1-1024x576.jpg)
དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་སྐྱོན་བརྗོད་ཀྱི་ལྡི་ལིར་ལས་འགུལ།
ཕྱི་ལོ་ ༢༠༢༢ ཟླ་ ༢ ཚེས་ ༤ ཉིན་རྒྱ་ནག་གི་རྒྱལ་ས་པེ་ཅིང་དུ་རྒྱལ་སྤྱིའི་དགུན་དུས་ཨོ་རྩལ་འགྲན་ཚོགས་དེ་བཞིན་དངོས་སུ་འགོ་འཛུགས་བྱེད་ཉིན་དང་སྟབས་བསྟུན་གྱིས་བོད་ཀྱི་གཞོན་ནུ་ལྷན་ཚོགས་ནས་རྒྱ་གར་གྱི་རྒྱལ་ས་ལྡི་ལིར་གཞིས་རྒྱ་ཆེ་བའི་ལས་འགུལ་སྤེལ་འཆར་གྱི་གྲ་སྒྲིག་གང་ཙམ་བྱས་རུང་། རྒྱ་ནད་ཏོག་དབྱིབས་རིམས་ནད་ཀྱི་སྒྲིག་གཞིའི་ཚད་བཀག་དང་། རྒྱ་གར་གྱི་གྲོས་ཚོགས་ཚོགས་དུས་དང་སྐབས་ཁེལ་ཡོད་སྟབས་འཆར་གཞི་གཞིར་བཟུང་ལས་འགུལ་སྤེལ་ཐུབ་མེད་རུང་། འབྲེལ་ཡོད་དཔོན་རིགས་ཁག་ལ་འབྲེལ་བ་དང་། ས་གནས་ཀྱི་ཉེས་ཏོག་དཔོན་སོགས་ནས་དགོངས་ཞུའི་ཆོག་ཆེན་གྱིས་རྒྱ་ནག་གཞུང་ཚབ་ཉེ་ཁྲིས་ཀྱི་ (Teen Murti Chowk) རུ་ཞི་རྒོལ་སྐད་འབོད་རྒྱག་རྒྱུའི་ཆོག་ཆེན་ཐོབ་ཡོད།
ཉིན་དེར་ལྡི་ལི་བསམ་ཡས་གླིང་དང་རོ་ཧི་ནི་ས་གནས་གཞོན་ལྷན་གྱི་མཐུན་འགྱུར་རོགས་རམ་འོག་བསམ་ཡས་གླིང་བོད་མིའི་གཞིས་སྒར་གྱི་མི་མང་དང་། རོ་ཧི་ནི་བོད་ཁྱིམ་སྡོད་ཁང་གི་སློབ་མ། དེ་བཞིན་ལྡི་ལི་བྷོཌ་ཝི་ཧར་དང་། ལལ་ཀེ་ལ་བཅས་ནས་མི་མང་ཕོན་ཆེ་འདུ་འཛོམས་ཀྱིས། ངོ་རྒོལ་སྐད་འབོད་དང་། གོམ་བགྲོད་ལས་འགུལ་འགོ་འཛུགས་མ་བྱས་གོང་གཞོན་ལྷན་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་ནས་དབྱིན་བོད་གཉིས་ནང་གཏམ་བཤད་སྤེལ་ཏེ་རྒྱ་ནག་ཏུ་ཚོགས་རྒྱུའི་ཨོ་རྩལ་འགྲན་ཚོགས་ལ་ངོ་རྒོལ་སྐད་འབོད་ཀྱི་དགོས་དམིགས་དང་། བོད་མི་རྣམས་ནས་མུ་མཐུད་ལས་འགུལ་སྤེལ་དགོས་པའི་གལ་གནད་སོགས་ཀྱི་ཐད་གཏམ་བཤད་སྤེལ་གནང་ཡོད། དེ་རྗེས་གཞོན་ལྷན་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་ནས་དབྱིན་སྐད་གྱི་བསྒྲགས་གཏམ་སྒྲོག་སྦྱང་དང་། ཟུང་དྲུང་ཚེ་དབང་རབ་རྒྱས་ལགས་ནས་ཧིན་སྐད་ནང་བསྒྲགས་གཏམ་སྒྲོག་སྦྱང་གནང་སྟེ་གོམ་བགྲོད་དངོས་སུ་འགོ་འཛུགས་བྱས་ཡོད་པ་མ་ཟད། དང་བླངས་ལས་འགུལ་བ་ཁག་གཅིག་ནས་ངོ་རྒོལ་སྐད་འབོད་ཀྱིས་མདུན་མཆོང་གནང་སྐབས་རྒྱ་གར་ཉེན་རྟོག་པས་འཛིན་བཟུང་བྱས་ཏེ་ཅ་ན་ཀེའི་པུ་རིའི་བཙོན་ཁང་དུ་ཉིན་ཕྱེད་རིང་བཀག་ཉར་བྱས་ཡོད།
ཉིན་དེའི་དགོང་མོར་ལྡི་ལི་བསམ་གཡས་གླིང་ས་གནས་གཞོན་ལྷན་གྱིས་གོ་སྒྲིག་འོག་ལྡི་ལི་བོད་སྒར་བསམ་ཡས་གླིང་དུ་མར་མེའི་ཁྲོམ་སྐོར་ཞིག་གོ་སྒྲིག་ཞུས་ཏེ་ལས་འགུལ་ནང་མཉམ་ཞུགས་གནང་མཁན་རྣམས་ལ་ཐུགས་རྗེ་ལེགས་གསོལ་ཞུས་ཡོད་པ་མ་ཟད། སྐབས་དེར་གཞོན་ལྷན་སྤྱི་ཁྱབ་ཚོགས་གཙོ་མགོན་པོ་དོན་གྲུབ་ལགས་ནས་གཏམ་བཤད་གནང་སྟེ་མི་མང་རང་བཞིན་གྱི་ལས་འགུལ་ནང་མི་མང་གང་མང་ནས་མཉམ་ཞུགས་ཀྱིས་བོད་བསྟན་སྲིད་མི་རིགས་ཀྱི་དོན་དུ་འཐབ་རྩོད་ནང་ནུས་པ་སྤུངས་གནང་ཡོང་བའི་འབོད་སྐུལ་ཞུས་ཡོད་པ་མ་ཟད། བོད་མིའི་ནང་ཁུལ་མཐུན་སྒྲིལ་རྡོག་རྩ་གཅིག་སྒྲིལ་གྱིས་དགྲ་བོ་རྒྱ་དམར་གཞུང་གི་བྱ་ངན་སྤྱོད་ངན་རྣམས་ཐེར་འདོན་བྱ་དགོས་པའི་སྐུལ་མ་གནང་བའི་ཐོག་ཉིན་དེའི་ལས་འགུལ་མཇུག་སྒྲིལ་ཡོད།
ཉིན་དེར་བཞུགས་སྒར་དྷ་སར་ཡང་བོད་ཀྱི་གཞོན་ནུ་ལྷན་ཚོགས་གཙོས་པའི་གཞུང་འབྲེལ་མིན་པའི་ཚོགས་པ་ཆེ་ཁག་ལྔ་ཐུན་མོང་ནས་རྒྱ་ནག་ཏུ་འགོ་འཛུགས་བྱས་པའི་དགུན་དུས་ཨོ་རྩལ་འགྲན་ཚོགས་ལ་ངོ་རྒོལ་སྐྱོན་བརྗོད་ཀྱིས་ཉིན་གང་བོར་བཞུགས་སྒར་རྡ་སའི་ཁྲོམ་གཞུང་དུ་ཟས་བཅད་ངོ་རྒོལ་གྱི་ལས་འགུལ་སྤེལ་ཏེ་གཞོན་ལྷན་སྒྲིག་འགན་སྤེན་པ་ཚེ་རིང་ལགས་ནས་མཉམ་ཞུགས་གནང་ཡོད།