དེ་རིང་ཕྱི་ལོ་ ༢༠༢༤ ཟླ་ ༩ ཚེས་ ༥ ཉིན་གྱི་ཉིན་རྒྱབ་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཡིག་ཚང་དུ་དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཟུར་པ་སྐུ་ངོ་ཨ་ཅཱརྱ་ཡེ་ཤེས་ཕུན་ཚོགས་མཆོག་དང་བོད་དོན་རྒྱབ་སྐྱོར་བ་སྐུ་ཞབས་རི་ཤི་ཀུ་མཱར་མཆོག གཞན་ཡང་ཀང་ར་རྫོང་ཁོངས་ཀྱི་བྷི་ཇེ་པི་ཚོགས་པའི་ཚོགས་གཙོ་སྐུ་ཞབས་ཝི་ཤཱལ་སིང་ནེ་རི་ཡ་མཆོག་བཅས་དང་མཇལ་འཕྲད་ཀྱིས་བོད་དོན་འཐབ་རྩོད་དང་འབྲེལ་བའི་ཐད་བཀའ་བསྡུར་ལྷུག་པོ་བྱུང་ཡོད།

བོད་ཀྱི་རྒྱལ་ཡོངས་མང་གཙོ་ཚོགས་པ་བཙུགས་ཏེ་ལོ་ངོ་ཧྲིལ་པོ་ ༣༠ འཁོར་བའི་དུས་སྟོན་སྲུང་བརྩིའི་སྐབས། བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་མགོན་པོ་དོན་གྲུབ་མཆོག་དམིགས་བསལ་སྐུ་མགྲོན་དུ་གདན་ཞུས་ལྟར་ཆེད་བཅར་གྱིས། ཚོགས་པ་འདི་བཞིན་ཐོག་མར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་གཞོན་ལྷན་གྱི་འགན་ལྷན་དང་ཚོགས་ཆེན་རིམ་པར་གོ་བསྡུར་སྦྱང་བཤད་གནང་སྟེ་བོད་ཀྱི་གཞོན་ནུ་ལྷན་ཚོགས་ནས་གསར་འཛུགས་བྱས་པའི་ཚོགས་པ་ཞིག་ཡིན་ཚུལ་སོགས་ཀྱི་གཏམ་བཤད་ཡང་གནང་ཡོད། གཞན་ཡང་མཛད་སྒོའི་སྐུ་མགྲོན་གཙོ་བོར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཞོན་ཟུར་པ་དང་། བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་ཟུར་ཨཅརྱ་ཡེ་ཤེས་ཕུན་ཚོགས་མཆོག སྐུ་མགྲོན་གཞན་དུ་བོད་ཀྱི་རྒྱལ་ཡོངས་མང་གཙོ་ཚོགས་པའི་སློབ་སྟོན་པ་ཐུབ་བསྟན་སྙན་གྲགས་ལགས། གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་ལས་སྣེ་རྣམ་པ། བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་གཙོ་གཙོས་པའི་རྒྱུན་ལས་རྣམ་པ་དང་། དེ་བཞིན་ས་གནས་མི་མང་བཅས་ཕེབས་འདུག

ཧོ་ལན་ཌ་བོད་རིགས་ཚོགས་པའི་མཐུན་འགྱུར་གོ་སྒྲིག་འོག་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཞོན་བཀྲ་ཤིས་རྟགས་རྒྱས་དང་སྒྲིག་འཛུགས་འགན་འཛིན་ཡེ་ཤེས་ཆོས་འཕེལ་རྣམ་གཉིས་ནས་ཧོ་ལན་ཌ་བོད་རིགས་མང་ཚོགས་ལ་བོད་ནང་གི་ཛ་དྲག་གནས་སྟངས་དང་བོད་ཀྱི་གཞོན་ནུ་ལྷན་ཚོགས་སྒྲིག་འཛུགས་ཀྱི་གལ་གནད། གཞན་ཡང་ད་ལྟའི་ཆར་ཆོལ་གསུམ་བོད་རིགས་ནང་ཁུལ་སྡོག་རྩ་ཆིག་སྒྲིལ་ངང་ནུས་པ་མཉམ་སྤུང་གིས་དགྲ་བོ་རྒྱ་དམར་སྲིད་གཞུང་ལ་ངོ་རྒོལ་དང་འགོག་རྒོལ་གྱི་ལས་འགུལ་སྤེལ་དགོས་གལ་སོགས་ཀྱི་ཐད་གཏམ་བཤད་གནང་ཡོད། སྐབས་དེར་ཧོ་ལན་ཌ་བོད་རིགས་ཚོགས་པས་རྒྱབ་སྐྱོར་སྣེ་ལེན་གང་ལེགས་དང་། བོད་རིགས་མང་ཚོགས་ནས་ཀྱང་རྒྱབ་སྐྱོར་ཤུགས་ཆེར་གནང་སོང་བས་འབྲེལ་ཡོད་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན།

བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་དང་དྲུང་ཆེ་གཉིས་ནས་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཟུར་པ་སྐུ་ངོ་བཀའ་ཟུར་ཀརྨ་ཡེ་ཤེས་མཆོག་ལ་མཇལ་བཅར་གྱིས་སྐུ་ངོ་མཆོག་བཙན་བྱོལ་བོད་མིའི་ལས་བྱེད་འདེམས་ལྷན་གྱི་ཚོགས་གཙོར་བསྐོ་གཞག་བྱུང་བར་འཚམས་འདྲི་ཞུས་ཡོད།

དེ་རིང་ཕྱི་ལོ་ ༢༠༢༤ ཟླ་ ༩ ཚེས་ ༢ ཉིན་གྱི་ཉིན་རྒྱབ་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་མགོན་པོ་དོན་གྲུབ་མཆོག་དང་གཞུང་འབྲེལ་མིན་པའི་ཚོགས་པ་ཆེ་ཁག་བཞིའི་སྐུ་ཚབ་རྣམས་ནས་ཨི་སི་ཏཱོ་ནི་ཡའི་བོད་དོན་རྒྱབ་སྐྱོར་བ་དང་གྲོས་ཚོགས་འཐུས་མི་ཁག་གཅིག་དང་ཐུག་འཕྲད་ཀྱིས་ཚོགས་པ་ཁག་གི་ངོ་བོ་དང་དམིགས་ཡུལ། གཞན་ཡང་ལས་དོན་བྱེད་ཕྱོགས་གཙོས་ད་ལྟའི་ཆར་བོད་ནང་གི་ཛ་དྲག་གནས་སྟངས་སོགས་ཀྱི་ཐད་གོ་བསྡུར་ཞུ་རྒྱུ་བྱུང་ཡོད།

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཞབས་པུས་སྨན་བཅོས་ལེགས་གྲུབ་ཀྱིས་བྱང་ཨ་རིས་གཙོས་ཡུ་རོབ་ཁུལ་གྱི་མཛད་འཆར་ལེགས་གྲུབ་བྱུང་ཏེ་བཞུགས་སྒར་དུ་ཕྱིར་ཕེབས་གནང་སྐབས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ལས་བྱེད་རྣམས་ཀྱིས་གྷ་གྷལ་གནམ་ཐང་ནས་ཕེབས་བསུ་ཞུ་རྒྱུའི་སྐལ་བཟང་གི་གོ་སྐབས་བྱུང་ཡོད།

འགན་ལྷན་ཐེངས་ ༥༤ པའི་ལས་བསྡོམས།

བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༥༤ པ་དེ་བཞིན་དབུས་གཞོན་ལྷན་གྱི་གོ་སྒྲིག་དང་སྒང་ཏོག་ས་གནས་གཞོན་ལྷན་གྱི་མཐུན་འགྱུར་འོག་ཕྱི་ལོ་ ༢༠༢༤ ཟླ་ ༨ ཚེས་ ༦ ནས་ ༡༠ བར་རྒྱ་གར་བྱང་ཤར་འབྲས་ལྗོངས་མངའ་སྡེའི་རྒྱལ་ས་སྒང་ཏོག་གི་གྲོས་ཚོགས་རྭ་བའི་ནང་སྐོང་ཚོགས་ཞུས་ཡོད་པ་དང་། དབུས་གཞོན་ལྷན་གྱི་རྒྱུན་ལས་ལས་བྱེད་རྣམས་སྤྱི་ཟླ་ ༧ ཚེས་ ༢༩ ནས་རྒྱ་གར་རྒྱལ་ས་ལྡི་ལིར་རིམ་ཐོན་གྱིས་ཕྱི་ཚེས་ ༣༠ ཉིན་རྒྱ་གར་རྒྱལ་ས་ལྡི་ལིར་རྒྱ་ནག་གཞུང་ཚབ་ཁང་གིས་རྒྱ་ནག་མི་དམངས་བཅིངས་འགྲོལ་དམག་འགོ་འཛུགས་ཀྱི་དུས་དྲན་སྲུང་བརྩི་བྱེད་བཞིན་པར་བོད་ཀྱི་གཞོན་ནུ་ལྷན་ཚོགས་དང་རྒྱ་གར་བོད་དོན་རྒྱབ་སྐྱོར་ཚོགས་པ་འཕགས་བོད་མཛའ་འབྲེལ་ཚོགས་པ་ (BTSM) གཉིས་ནས་བོད་ནང་རྒྱ་གཞུང་གིས་བོད་ཀྱི་ཆོས་དང་རིག་གཞུང་རྩ་མེད་གཏོང་བཞིན་པ་མཚམས་འཇོག་དགོས་པའི་འབོད་སྒྲའི་འོག་ངོ་རྒོལ་སྐྱོན་བརྗོད་ཀྱི་ལས་འགུལ་ཞིག་སྤེལ་ཡོད་པ་དང་། སྤྱི་ཟླ་ ༨ ཚེས་ ༣ ཉིན་གྱི་ཉིན་རྒྱབ་ཕྱག་ཚོད་ ༣།༣༠ ཐོག་གཞོན་ལྷན་གྱི་རྒྱུན་ལས་ལས་བྱེད་རྣམས་ལྡི་ལི་རྒྱལ་སྤྱིའི་གནམ་ཐང་ནས་མཁའ་ཐོག་བརྒྱུད་རྒྱ་གར་ནུབ་བྷེང་གྷལ་(  West Bengal ) མངའ་སྡེའི་བྷག་དྷོ་ར་( Bagdora) གནམ་ཐང་དུ་ཕྱི་དྲོའི་ཕྱག་ཚོད་ ༥།༣༠ ཙམ་ལ་བདེ་འབྱོར་བྱུང་བ་དང་། དེ་གར་སྒང་ཏོག་ས་གནས་གཞོན་ལྷན་ནས་དབུས་རྒྱུན་ལས་དང་ལས་བྱེད་རྣམས་བསུ་སླད་མོ་ཊ་གཉིས་མངགས་གཏོང་གནང་ཡོད་པ་དང་། དེ་ནས་མུ་མཐུད་སྒང་ཏོག་ཏུ་ཐོན་ནས་ལམ་བར་ཕྱག་ཚོད་བདུན་ཙམ་མོ་ཊའི་ནང་ཕྱིན་རྗེས་དགོང་མོའི་ཕྱག་ཚོད་ ༡ ཙམ་ལ་སྒང་ཏོག་བསྡོད་གནས་མགྲོན་ཁང་དུ་བདེ་འབྱོར་བྱུང་། ཕྱི་ཚེས་ ༤ དང་ ༥ ཉིན་འགན་ལྷན་ཚོགས་ཡུལ་རྭ་བར་གྲ་སྒྲིག་འཐུས་ཚང་ཞུས། ཕྱི་ཚེས་ ༦ ཉིན་གྱི་ཞོགས་པ་ཕྱག་ཚོད་ ༩།༣༠ ཐོག་འགན་ལྷན་ཐེངས་ ༥༤ པའི་དབུ་འབྱེད་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོ་ལྕམ་སྐུ་ཆུང་ཆུང་བྷོ་ཊི་ཡ་ (Former Chairman-Sikkim Khadi and Village Industry Board) མཆོག་དང་། དམིགས་བསལ་སྐུ་མགྲོན་འཕགས་བོད་མཛའ་འབྲེལ་ཚོགས་པའི་དབུས་རྒྱུན་སྐུ་ཞབས་ (Prof Rudra Poudyel) མཆོག་དང་། འཕགས་བོད་འབྲེལ་མཐུད་ཚོགས་པའི་བྱང་ཤར་འཐུས་མི་སྐུ་ཞབས་པདྨ་དབང་གྲགས་མཆོག དེ་བཞིན་དབུས་གཞོན་ལྷན་གྱི་རྒྱུན་ལས་ལས་བྱེད། ས་གནས་གཞོན་ལྷན་ཁག་ ༣༦ ཡི་ཚོགས་བཅར་བ་གྲངས་ ༢༠༠ ལྷག་ཙམ་དང་། ལྷག་པར་སྒང་ཏོག་ས་གནས་གཞོན་ལྷན་གྱི་རྒྱུན་ཟུར་ཚོགས་མི་དང་། མི་མང་། དེ་བཞིན་ས་གནས་ཀྱི་གསར་འགོད་པ་བཅས་ཁྱོན་མི་གྲངས་ ༣༠༠ ལྷག་བཅར་ཡོད། གཞོན་ལྷན་གྱི་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་ནས་མཛད་སྒོ་གཙོ་སྐྱོང་ཐོག་སྐུ་མགྲོན་རྣམས་བཞུགས་གྲལ་དུ་འཁོད་རྗེས་སྐུ་མགྲོན་གཙོ་བོ་མཆོག་དང་དམིགས་བསལ་སྐུ་མགྲོན། གཞོན་ལྷན་ལས་ཐོག་ཚོགས་གཙོ་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་ཚོགས་ཁང་དུ་ཚོགས་བཅར་བ་ཡོངས་ཀྱི་སེར་འཕྲེང་དང་བཅས་གདན་འདྲེན་ཞུས་ཡོད་པ་དང་། དེ་རྗེས་སྐུ་མགྲོན་གཙོ་བོ་མཆོག་དང་གཞོན་ལྷན་ལས་ཐོག་ཚོགས་གཙོ་རྣམ་གཉིས་ནས་སྣང་གསལ་མར་མེ་ཞལ་ཁ་ཕྱེ་གནང་མཛད་པ་དང་། རིམ་བཞིན་སྐུ་བཞེངས་གནང་མུས་བོད་དང་རྒྱ་གར་གྱི་རྒྱལ་གླུ་དང་། གཞོན་ལྷན་གྱི་མཐུན་གཞས་བཅས་མཉམ་གཏོང་ཞུས། ལྷག་པར་སྐུ་བཞེངས་གནང་མུས་ཐོག་བོད་རྒྱལ་ཁབ་གྱི་རང་བཙན་སླར་གསོ་དང་། བོད་མི་རིགས་ཀྱི་བདེན་དོན་ཆེད་གཅེས་པའི་རང་སྲོག་ཚུན་བློས་གཏོང་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཞུམ་མེད་སྙིང་སྟོབས་དང་མཛད་རྗེས་ལ་གུས་བཀུར་རྗེས་དྲན་སླད་ངག་བཅད་གུས་འདུད་སྐར་མ་གཅིག་ཞུས། དེ་ནས་ཚང་མ་བཞུགས་གྲལ་དུ་འཁོད་རྗེས་སྒང་ཏོག་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་སྤེལ་ལགས་ནས་སྐུ་མགྲོན་དང་ཚོགས་བཅར་བ་ཡོངས་ལ་འཚམས་འདྲིའི་གསུང་བཤད་གནང་། བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་མགོན་པོ་དོན་གྲུབ་མཆོག་ནས་སྐུ་མགྲོན་གཙོ་བོ་དང་དམིགས་བསལ་སྐུ་མགྲོན་རྣམ་པར་གཞོན་ལྷན་གྱི་ཕྱག་རྟགས་ཕུལ་གྲུབ་རྗེས་འགན་ལྷན་ཐེངས་ ༥༤ པ་དང་འབྲེལ་བའི་ངོ་སྤྲོད་གསུང་བཤད་གནང་། དེ་རྗེས་དམིགས་བསལ་སྐུ་མགྲོན་འཕགས་བོད་མཛའ་འབྲེལ་ཚོགས་པའི་དབུས་རྒྱུན་སྐུ་ཞབས་ (Prof Rudra Poudyel)  མཆོག་ནས་གཞོན་ལྷན་གྱི་ལོ་འཁོར་ལས་བསྡོམས་ཀྱི་དཔེ་དེབ་དབུ་འབྱེད་དང་བཀའ་སློབ་གསུང་བཤད་གནང་། དེ་བཞིན་དམིགས་བསལ་སྐུ་མགྲོན་ཚེ་རིང་དབང་ཕྱུག་ལེབ་ཆ་མཆོག་ནས་གསུང་བཤད། དེའི་རྗེས་འཕགས་བོད་འབྲེལ་མཐུད་ཚོགས་པའི་བྱང་ཤར་འཐུས་མི་སྐུ་ཞབས་པདྨ་དབང་གྲགས་མཆོག་ནས་གཞོན་ལྷན་གྱི་དབྱིན་ཡིག་རང་བཙན་དུས་དེབ་དབུ་འབྱེད་གནང་ཡོད། གཞན་ཡང་སྐུ་མགྲོན་གཙོ་བོ་ལྕམ་སྐུ་ཆུང་ཆུང་བྷོ་ཊི་ཡ་ (Former Chairman-Sikkim Khadi and Village Industry Board) མཆོག་ནས་གཞོན་ལྷན་གྱི་བོད་ཡིག་ཉམས་ཞིབ་པས་བརྩམས་པ་དང་། གཞོན་ལྷན་གྱི་སྤྱི་ཁྱབ་དྲུང་ཆེ་དང་དབྱིན་ཡིག་ཉམས་ཞིབ་པ་དཀོན་མཆོག་ནོར་བུ་གཉིས་ནས་དབྱིན་ཡིག་ཐོག་ཕབ་བསྒྱུར་ཞུས་པའི་བོད་དབྱིན་ཤར་སྦྱར་གྱི་དེབ་ཆུང་ <<གཞུང་ས་དགའ་ལྡན་ཕོ་བྲང་དུས་སྐབས་ཀྱི་གལ་ཆེའི་ལོ་ཚིགས་དང་འབྲེལ་བོད་རང་བཙན་བདེན་དཔང་ལོ་རྒྱུས་གནད་བསྡུས།>> ཞེས་པ་དབུ་འབྱེད་གནང་བ་དང་། དེ་རྗེས་སྐུ་མགྲོན་གཙོ་བོ་མཆོག་ནས་གལ་ཆེའི་བཀའ་སློབ་གསུང་བཤད་ཟབ་རྒྱས་ཤིག་གནང་། དེ་རྗེས་གཞོན་ལྷན་སྤྱི་ཁྱབ་ཚོགས་གཞོན་བཀྲ་ཤིས་རྟགས་རྒྱས་མཆོག་ནས་ཐུགས་རྗེ་ཆེ་ཞུའི་གསུང་བཤད་དང་བཅས་མཛད་སྒོའི་ལས་རིམ་ཁག་ཡོངས་སུ་ལེགས་གྲུབ་བྱུང་ཡོད། 

དེ་རྗེས་སྔ་དྲོའི་ཚོགས་ཐེངས་གཉིས་པ་ནས་བཟུང་བོད་ཀྱི་གཞོན་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་  ༥༤ པའི་གྲོས་གཞི་དོན་ཚན་ཁག་དགུའི་ཐོག་བགྲོ་གླེང་གྲོས་བསྡུར་ཉིན་གྲངས་ལྔའི་རིང་གནང་རྗེས་ཉིན་མཐའ་མར་གྲོས་ཆོད་དོན་ཚན་ཁག་ ༢༣ གཏན་འབེབས་བྱུང་བ་མ་ཟད། ད་ལྟའི་ཆར་དགྲ་བོ་རྒྱ་དམར་སྲིད་གཞུང་ནས་བོད་ཀྱི་ཆོས་དང་རིག་གཞུང་སྐད་ཡིག་དང་བཅས་པ་རྩ་མེད་བཟོས་དང་བཟོ་མུས་ཡིན་པར་འགན་ལྷན་ཐེངས་ ༥༤ པའི་ཚོགས་ཐོག་ནས་ངོ་རྒོལ་སྐྱོན་བརྗོད་ཀྱི་བསྒྲགས་གཏམ་ཞིག་ཀྱང་སྤེལ་ཐུབ་པ་བྱུང་ཡོད། འགན་ལྷན་ཐེངས་ ༥༤ པ་ཡོངས་སུ་ལེགས་གྲུབ་བྱུང་བའི་དེ་ཉིན་དགོང་མོ་སྒང་ཏོག་བོད་མིའི་ཆོལ་ཁ་གསུམ་གྱི་ཚོགས་ཁང་ནང་སྒང་ཏོག་ས་གནས་གཞོན་ལྷན་གྱི་གོ་སྒྲིག་འོག་མཇུག་བསྡོམས་མཛད་སྒོ་ཞིག་གོ་སྒྲིག་གནང་ཡོད་པ་དང་། མཛད་སྒོའི་ཐོག་སྒང་ཏོག་ས་གནས་འགོ་འཛིན་དང་། དེ་བཞིན་ཚོགས་མཐུན་འགྱུར་རོགས་རམ་གནང་མཁན་གྱི་སྦྱིན་བདག་ཁག གཞན་ཡང་ཚོགས་པ་སྐྱིད་སྡུག་ཁག་གི་སྐུ་ཚབ། གཞས་སྣ་འཁྲབ་སྟོན་གྱི་ཚོགས་པ་ཁག གཞོན་ལྷན་དབུས་སའི་ཚོགས་བཅར་བ། ལྷག་པར་སྒང་ཏོག་གི་མི་མང་བཅས་མང་པོ་ཕེབས་ཡོད་པ་དང་། མཇུག་བསྡོམས་མཛད་སྒོའི་སྐབས་སྒང་ཏོག་ས་གནས་གཞོན་ལྷན་ལ་སྔ་ཕྱི་བར་གསུམ་དུ་རྒྱབ་སྐྱོར་དང་མཐུན་འགྱུར་རོགས་རམ་གནང་མཁན་སྤྱི་སྒེར་ཚང་མར་ཕྱག་རྟགས་གནང་སོང་བ་མ་ཟད། གཞོན་ལྷན་ས་གནས་ཁག་ནས་ཕེབས་པའི་ཚོགས་བཅར་བ་ཡོངས་ལ་མཇལ་དར་དང་ཕྱག་རྟགས་གནང་། ལྷག་པར་ས་གནས་ཁག་འདྲ་མིན་ནས་ཕེབས་པའི་ཚོགས་བཅར་བ་ཡོངས་ལ་བོད་རང་གི་བསོད་ཉམས་དོད་པའི་གཞས་སྣ་འཁྲབ་སྟོན་རིམ་པར་གནང་སོང་བར་ཚང་མས་དགའ་མོས་ཆེན་པོ་ཐོབ། དེ་རྗེས་འགན་ལྷན་ཐེངས་ ༥༤ པ་ལེགས་གྲུབ་བྱུང་བའི་རང་མོས་ཟློས་གར་ལས་རིམ་ཞིག་ཀྱང་སྔར་རྒྱུན་བཞིན་གོ་སྒྲིག་ཞུས། ཕྱི་ཉིན་ཚེས་ ༡༡ དང་ ༡༢ བཅས་ཉིན་གཉིས་རིང་སྒང་ཏོག་ས་གནས་གཞོན་ལྷན་གྱི་གོ་སྒྲིག་མཐུན་འགྱུར་འོག་ཚོགས་བཅར་བ་ཡོངས་སྒང་ཏོག་དང་རང་ཝང་ལ་སོགས་ཀྱི་ཁུལ་དུ་གནས་མཇལ་དུ་ཁྲིད་སླད་མོ་ཊ་གྲངས་ ༡༨ ཙམ་གླས་ནས་ཉིན་གཉིས་རིང་གནས་མཇལ་ཁག་གཅིག་ཏུ་ཁྲིད་ཡོད་པ་དང་། ཉིན་དང་པོའི་ཉིན་གུང་གཞལ་ལག་གང་རྒྱས་ཤིག་རང་ཝང་ལ་ས་གནས་གཞོན་ལྷན་གྱིས་གོ་སྒྲིག་གནང་ཡོད་པ་དང་། དེ་ཉིན་དགོང་མོ་གནས་མཇལ་བ་རྣམས་ཕི་ལིང་( pheling) ཞེས་པའི་ས་གནས་མགྲོན་ཁང་ཁག་ཅིག་ཏུ་བཞག་བསྡོད་བྱས། ཕྱི་ཉིན་་་་་་་སོགས་གནས་མཇལ་ཞུས་རྗེས་ས་གནས་དེ་རང་ནས་ཕན་ཚུན་སྐྱེལ་མ་དང་བཅས་རང་རང་སོ་སོའི་གནས་སུ་ཕྱིར་ལོག་བྱས། དབུས་གཞོན་ལྷན་གྱི་རྒྱུན་ལས་ལས་བྱེད་རྣམས་ས་ལུ་གྷ་རར་ཕྱིར་ཐོན་གྱིས་ཕྱི་དྲོའི་ཕྱག་ཚོད་ ༡༠ པ་ཙམ་ལ་བདེ་འབྱོར་བྱུང་བ་དང་། དེ་གར་ཡོད་པའི་ས་གནས་གཞོན་ལྷན་གྱི་ཚོགས་གཙོ་དབང་མོ་ལགས་ཀྱི་མགྲོན་ཁང་དུ་རིན་མེད་ཐོག་གནས་ཚང་གཡར་བ་དང་། ཕྱི་ཚེས་ ༡༣ ཉིན་དབུས་གཞོན་ལྷན་གྱི་རྒྱུན་ལས་ལས་བྱེད་ཡོངས་ལ་དེ་གའི་ས་གནས་རྒྱུན་ལས་པ་ས་ནུ་བྷའེ་འམ་ཨམ་མདོ་བཀྲ་ཤིས་ལགས་ཀྱི་ནང་དུ་ཉིན་གུང་ཞལ་ལག་གནང་བ་དང་། དེ་རྗེས་བྷག་དྷོ་ར་གནམ་ཐང་དུ་ཐོན་ནས་ཕྱི་དྲོ་ཕྱག་ཚོད་ ༥།༣༠ ཙམ་ལ་གནམ་ཐོག་བརྒྱུད་དགོང་མོ་ཕྱག་ཚོད་ ༧།༣༠ ཙམ་ལ་ལྡི་ལིར་བདེ་འབྱོར་བྱུང་ཡོད། ཕྱི་ཚེས་ ༡༤ ཡི་དགོང་མོར་རྒྱུན་ལས་ལས་བྱེད་ཕལ་མོ་ཆེ་བཞུགས་སྒར་རྡ་སར་ཕྱོགས་ཐོན་གྱིས་ཕྱི་ཚེས་ ༡༥ ཡི་ཞོགས་པ་བཞུགས་སྒར་རྡ་སར་བདེ་འབྱོར་བྱུང་ཡོད།

ཕྱི་ལོ་ ༢༠༢༤ ཟླ་ ༧ ཚེས་ ༧ ཉིན་གྱི་ཕྱི་དྲོ་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཞོན་བཀྲ་ཤིས་རྟགས་རྒྱས་མཆོག་ནས་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་གཞན་གྱི་སྐུ་ཚབ་དང་ལྷན་འབྲས་ལྗོངས་མངའ་སྡེའི་ནང་སློབ་གཉེར་གནང་བཞིན་པའི་སློབ་ཕྲུག་གྲངས་ ༣༠ ཙམ་དང་སྒང་ཏོག་ཁུལ་གྱི་བོད་པའི་ཚོགས་པ་ཁག་གི་སྐུ་ཚབ་བཅས་ལ་ཐུག་འཕྲད་ཀྱིས་གཞོན་ལྷན་སྒྲིག་འཛུགས་ཀྱི་དམིགས་ཡུལ་དང་ལས་དོན་བྱེད་ཕྱོགས། དེ་བཞིན་བོད་ནང་གི་ཛ་དྲག་གནས་སྟངས་སོགས་ཀྱི་ཐད་གོ་རྟོགས་སྤེལ་ཡོད།