དེ་རིང་ཕྱི་ལོ་ ༢༠༢༤ ཟླ་ ༡༡ ཚེས་ ༢༤ ཉིན་བོད་ཀྱི་གཞོན་ནུ་ལྷན་ཚོགས་ཀྱི་སྦག་སྦག་སྐོར་སྐྱོད་ལས་འགུལ་བ་རྣམས་ཞོགས་པ་ཕྱག་ཚོད་ ༥།༣༠ ཐོག་མཁྱེན་མཛེས་མ་ནི་རུ་ཕྱོགས་ཐོན་དང་། ལམ་བར་དུ་ལུང་ལ་བྷི་ཇ་པི་མཚན་པས་གཞུང་འབྲེལ་བཞུགས་གནས་སུ་ཞོགས་ཟས་འདེགས་འབུལ་གྱིས་སྣེ་ལེན་ཞུས་གནང་ཡོད། དེའི་རྗེས་ལས་འགུལ་བ་རྣམས་སྒྲོལ་ལྗང་དགོན་པར་མཆོད་མཇལ་གནང་སྐབས་དགོན་བདག་ནས་འཚམས་འདྲིའི་མཇལ་དར་སྒྲོན་འབུལ་དང་བོད་མིའི་འཐབ་རྩོད་སྤྱི་དང་གཞོན་ལྷན་གྱི་བོད་དོན་དྲིལ་བསྒྲགས་ལམ་ལྷོངས་ཡོང་ཕྱིར་གསོལ་སྨོན་སོགས་བསྐྱོན་གནང་མཛད།
དེ་རྗེས་མུ་མཐུད་ཕྱག་ཚོད་གསུམ་ཙམ་སྦག་སྦག་སྐོར་སྐྱོད་གྲུབ་མཚམས་ལོ་རྒྱུས་རང་བཞིན་གྱི་མཁྱེན་མཛེས་མ་ནི་ས་ཚིགས་སུ་བདེ་འབྱོར་བྱུང་ཡོད། ས་ཚིགས་དེ་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཆེས་ཐོག་མར་རྒྱ་གར་ས་ཐོག་ཏུ་བཙན་བྱོལ་དུ་ཕེབས་འབྱོར་གྱིས་ཨ་སམ་དམག་སྡེའི་དམག་དཔོན་དང་།
ཆབ་སྲིད་སྐུ་ཚབ་སྐུ་ཞབས་མུར་ཐི་མཆོག་ནས་སྣེ་ལེན་ཞུ་སའི་ས་ཚིགས་དེ་ཡིན་འདུག ཆེས་གལ་གནད་ཆེ་བའི་ས་ཚིགས་འདིར་ལས་འགུལ་བ་ཡོངས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་ཆེད་དང་བོད་མིའི་རང་བཙན་སླར་གསོའི་སླད་སྨོན་ལམ་གསོག་སྒྲུབ་གནང་ཡོད་པ་མ་ཟད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་ཕྱག་བཏབས་གནང་མཛད་པའི་ལྗོན་ཤིང་ལ་ཡང་མཇལ་ཁ་དང་བཅས་ལོ་རྒྱུས་རང་བཞིན་གྱི་ས་ཚིགས་འདིར་བོད་རྒྱལ་ཁབ་ཆེན་པོའི་རྒྱལ་གླུ་མཉམ་གཏོང་གིས་གོར་གསུམ་མཆོད་རྟེན་དུ་གནས་མཇལ་དང་བཅས་ཕྱིར་རྟ་དབང་དུ་དགོང་དྲོ་ཕྱག་ཚོད་ ༦།༣༠ ཐོག་བདེ་འབྱོར་བྱུང་ཡོད།