བོད་ཀྱི་གཞོན་ནུ་ལྷན་ཚོགས་ཀྱི་བྱང་ཨ་རིའི་འགན་འཛིན་ལྷན་ཚོགས་ཐེངས་ ༢༡ པ་དེ་བཞིན་བྱང་ཨ་རིའི་མི་ནི་སོ་ཊ་ས་གནས་གཞོན་ལྷན་གྱི་གོ་སྒྲིག་འོག་ཕྱི་ལོ་ ༢༠༢༤ ཟླ་ ༦ ཚེས་ ༢༨ ནས་ ༣༠ བར་ཉིན་གསུམ་རིང་སྐོང་ཚོགས་གནང་ཡོད་པ་དང་། དབུ་འབྱེད་མཛད་སྒོའི་སྐུ་མགྲོན་གཙོ་བོར་བྱང་ཨ་རིའི་དཔལ་ལྡན་བོད་མི་མང་སྤྱི་འཐུས་དང་གཞོན་ལྷན་ཚོགས་གཙོ་ཟུར་པ་བསྟན་འཛིན་འཇིགས་མེད་མཆོག དམིགས་བསལ་སྐུ་མགྲོན་དུ་གཞོན་ལྷན་ཚོགས་ཟུར་དང་སྤྱི་ཟུར་ཚེ་དབང་རིག་འཛིན་མཆོག་གཙོས་བོད་རིགས་སྤྱི་མཐུན་ཚོགས་པ་དང་ཚོགས་སྡེ་ཁག་གི་སྐུ་ཚབ། གཞན་ཡང་བྱང་ཨ་རིའི་གཞོན་ལྷན་ས་གནས་ཁག་གི་སྐུ་ཚབ་སོགས་ཆེད་འཛོམས་གནང་བའི་ཐོག་འགན་ལྷན་ཐེངས་ ༢༡ པ་དངོས་སུ་དབུ་འཛུགས་གནང་ཡོད། བྱང་ཨ་རིའི་འགན་ལྷན་ཉིན་གསུམ་རིང་གཞོན་ལྷན་སྤྱི་ཁྱབ་ཚོགས་གཙོ་མཆོག་གིས་གཙོ་སྐྱོང་འོག་གྲོས་གཞི་དོན་ཚན་ཁག་བརྒྱད་ཀྱི་ཐོག་གོ་བསྡུར་སྦྱང་བཤད་དང་དེ་དག་ལ་གྲོས་ཆོད་གཏན་འབེབ་ཞུས་ཏེ་འགན་འཛིན་ལྷན་ཚོགས་ལེགས་གྲུབ་བྱུང་ཡོད།