༄༅། །ཕྱི་ཟླ་༡༡ ཚེས་ ༢༢ ཉིན་རྟ་དབང་དུ་ལམ་ལྷོང་ལྡན་པའི་ངོ་རྒོལ་དང་མི་མང་འདུ་འཛོམས་གནང་རྗེས། བོད་ཀྱི་གཞོན་ནུ་ལྷན་ཚོགས་ཀྱི་རྐང་འཁོར་སྐོར་སྐྱོད་ཀྱི་ལས་འགུལ་བ་རྣམས་ལ་ཨ་རུ་ན་ཅལ་མངའ་སྡེའི་ཆོས་དང་རིག་གཞུང་ལྷན་ཁང་གི་ཚོགས་གཙོ་སྐུ་ཞབས་འཇམ་དཔལ་དབང་འདུས་ལགས་ཀྱིས་གསོལ་ཇའི་སར་དགའ་བསུའི་སྣེ་ལེན་གནང་ཡོད། སྐབས་དེར་ཁོང་གིས་ལས་འགུལ་བ་ཡོངས་ལ་ཁ་བཏགས་གཡོགས་ནས་ཁོང་དང་ཁོང་གི་ནང་མི་ནས་བོད་དོན་ལ་རྒྱབ་སྐྱོར་དང་བོད་རྒྱལ་ཁབ་ཆེན་པོའི་རྒྱལ་དར་སྡོད་ཁྱིམ་ནང་འཕྱར་བཞིན་པ་དེས་དམིགས་གསལ་ལས་འགུལ་བ་རྣམས་ལ་སེམས་ཤུགས་སྤར་ཡོད།
སྐུ་ཞབས་འཇམ་དཔལ་ལགས་ཀྱིས་ཁོང་གི་ཡབ་དམ་པ་སྐུ་ཞབས་ཀརྨ་དབང་འདུས་ལགས་ནི་པདྨ་ཤྲི་གཟེངས་རྟགས་བཞེས་མྱོང་མཁན་དང་བློན་ཆེན་ཟུར་པ་ཞིག་ཡིན་པ། ཁོང་ནི་བོད་དོན་ལ་རྒྱབ་སྐྱོར་ཤུགས་ཆེན་པོ་གནང་མཁན་ཞིག་ཡིན་པ་བཅས་བོད་དང་བོད་མིའི་ཆེད་དུ་ལས་འགུལ་མང་པོ་ཞིག་ལ་སྣེ་ཁྲིད་གནང་མཁན་གྱི་རླབས་ཆེན་མི་སྣ་ཞིག་ཀྱང་ཡིན་འདུག བོད་ཀྱི་གཞོན་ནུ་ལྷན་ཚོགས་ཀྱིས་སྐུ་ཞབས་འཇམ་དཔལ་ལགས་དང་ཁོང་གི་ནང་མི་ཡོངས་ཀྱིས་བོད་དོན་ཐད་རྒྱུན་དུ་རྒྱབ་སྐྱོར་ཤུགས་ཆེ་གནང་པར་སྙིང་ཐག་པ་ནས་བཀའ་དྲིན་ཆེ་དང་། ཐུགས་རྗེ་ཆེ་ཞེས་ཞུ་རྒྱུ་བྱུང་ཡོད།
