བྱང་ཨ་རིའི་ཨེ་ཤེ་ཡའི་འཐབ་གྲོགས་ཀྱི་ལྷན་ཚོགས་ཐེངས་དང་པོར་མཉམ་ཞུགས།
ཕྱི་ལོ་ ༢༠༢༢ ཟླ་ ༡ ཚེས་ ༢ ཉིན་བྱང་ཨ་རིའི་ནིའུ་ཡོག་དང་ནིའུ་ཇ་སིའི་ས་གནས་གཞོན་ལྷན་གྱི་གོ་སྒྲིག་འོག་ནིའུ་ཡོག་ཏུ་ཕུན་ཚོགས་སྡེ་བཞིའི་ཚོགས་ཁང་ནང་ཨེ་ཤེ་ཡའི་འཐབ་གྲོགས་ལྷན་ཚོགས་ཐེངས་དང་པོ་ཞེས་པའི་མཛད་སྒོ་ཞིག་སྐོང་ཚོགས་གནང་ཡོད་པ་དང་། སྐབས་དེའི་མཛད་སྒོའི་ཐོག་ཡུ་གུར་དང་། ལྷོ་སོག ཧོང་ཀོང་། ཐའེ་ཝན། ཝི་ཏི་ནམ། མད་མར། བོད་བཅས་ཀྱི་སྐུ་ཚབ་ཁག་མཉམ་ཞུགས་གནང་ཡོད་པ་དང་།
སྐབས་དེར་བོད་ཀྱི་སྐུ་ཚབ་ཏུ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་དང་། སྒྲིག་འཛུགས་འགན་འཛིན་སྤེན་པ་ཚེ་རིང་ལགས་རྣམ་གཉིས་ནས་མཉམ་ཞུགས་གནང་ཡོད། ལྷན་ཚོགས་ཀྱི་མཛད་སྒོའི་ལས་རིམ་ཁག་ལེགས་གྲུབ་བྱུང་རྗེས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱི་གཙོ་སྐྱོང་འོག་མ་འོངས་རྒྱ་ནག་གི་བཙན་གནོན་ལ་གདོང་ལེན་དང་། ཨེ་ཤེ་ཡའི་རང་དབང་དང་། དམངས་གཙོ། ཞི་བདེ་སྲུང་སྐྱོབ་བཅས་བརྗོད་གཞི་མི་འདྲ་བའི་ཐོག་བགྲོ་གླེང་གོ་བསྡུར་གང་ལེགས་བྱུང་ཡོད།